Հարկային մարմինները կարող են ֆիզիկական ուժ կիրառել. ՊԵԿ

«Եթե եղել են վայրագություններ, ապա կարող են դիմել իրավապահներին։ Եթե կան նման դեպքեր, ապա կարող են դիմել համապատասխան մարմինների, ովքեր կպարզեն, եղել է, թե ոչ: Հայտարարություն կատարելով չէ միայն», - ԱԺ-ում լրագրողների հետ ճեպազրույցում ասաց  Պետական եկամուտների կոմիտեի նախագահի տեղակալ Վախթանգ Միրումյանը այսօր խորհրդարանում, անդրադառնալով «Ծառուկյան» խմբակցության պատգամավորների հայտարարություններին: Հարցին, թե կա նաև համապատասխան տեսանյութ, որը նկարահանել է Կենտրոն հեռուստաընկերությունը և աշխատակիցն էլ պնդում է տեղի ունեցածի մասին, Միրումյանն արձագանքեց, որ չի տեսել այդ տեսանյութը։ Հարկային մարմինները օրենսգրքով սահմանված կարգով իրավունք ունեն կիրառել ֆիզիկական ուժ, որն, իհարկե, սահմանափակումներ ունի: Մասնավորապես, այն դեպքում, եթե հարկային մարմնի ներկայացուցիչը ենթարկվել է հարձակման: