Դատավոր Արմինե Սաֆարյանին պատասխանատվության ենթարկելու միջնորդության քննությունն ավարտվեց․ ԲԴԽ-ն հեռացել է խորհրդակցական սենյակ

Երևանի ընդհանուր իրավասության քաղաքացիական դատարանի դատավոր Արմինե Սաֆարյանին կարգապահական պատասխանատվության ենթարկելու միջնորդության քննությունը ԲԴԽ-ում ավարտվեց։

Կարգապահական վարույթը հարուցվել է ՀՀ արդարադատության նախարարության կողմից՝ քաղաքացու հաղորդման հիման վրա։ Ըստ վարույթի՝ դատավոր Սիմա Իսկանդարյանի՝ լիազորությունների դադարեցումից հետո նրա վարույթում գտնվող գործը վերամակագրվել դատավոր Սաֆարյանին, սակայն, ըստ ԱՆ-ի՝ դատավորը 2 տարի 5 ամսվա ընթացքում որևէ գործողություն չի իրականացրել, դատավորը դիմումատուին հասանելի չի դարձրել իր դիրքորոշումը։

Դատավոր Արմինե Սաֆարյանը, ներկայացնելով պատասխանը, ուշադրություն հրավիրեց այն հանգամանքին, որ վարույթ հարուցող մարմինը՝ ՀՀ ԱՆ-ն, ժամկետների խախտում է թույլ տվել՝ վարույթի հարուցման և ԲԴԽ միջնորդությամբ դիմելու ընթացքում։ Ժամկետների երկարաձգումը, դատավորի գնահատմամբ, իրավաչափ չէր, վարույթ հարուցող մարմինը զրկված չէր շուրջ 1,5 ամիս ժամկետում հարցումներ իրականացրել, նույնիսկ՝ պարտավոր էր։ Դատավորը համաձայն է, որ այդ հիմքով վարույթը կարճվի։ Բացի այդ, առկա է իրավական որոշակիության խնդիր, պարզ չէ՝ կոպիտ անփութությամբ էր թույլ տրվել խախտումը, թե դիտավորությամբ, մինչդեռ, դատավորի գնահատմամբ՝ հենց դա պետք է հիմք լիներ՝ վարույթի հարուցման, ասել է թե՝ դա ինքնին վկայում է, որ վարույթը հարուցվել է՝ առանց օրենքով սահմանված հիմքերի։ Սաֆարյանը նաև ուշադրություն հրավիրեց այն հանգամանքին, որ ԱՆ-ն դուրս է եկել հարուցած վարույթի շրջանակներից՝ դատավորին վերագրելով նոր խախտումներ։ Միևնույն ժամանակ՝ դատավորը հայտնեց, որ իր կողմից գործողություններ իրականացվել են, մասնավորապես, Բասմանի դատարան համապատասխան միջնորդություն և գրություն է ուղարկվել։ Նշված դատարանը պետք է կայացնիր անձի վերաբերյալ համապատասխան դատական ակտը։

«Քաղաքացին դիմել է, կա վեճ, վեճի առումով վճիռ, որով այդ ընկերությունը, որը ՌԴ ընկերություն է, մասնաճյուղը՝ ՀՀ-ում է, ՀՀ-ում ուղարկվել է հարկադիր կատարման, մասնակի բավարարվել, մնացած մասով ենթակա է ուղարկման այլ պետության դատարան, որը հանդիսանում է պատասխանողի գտնվելու վայրի դատարանը, որպիսին, ըստ տեղեկության, Բասմանի շրջանի դատարանն է»,- պարզաբանեց դատավորը։

Դատավորը նաև ԲԴԽ-ին ներկայացրեց փաստաթուղթը՝ Բասմանի դատարան ուղարկված միջնորդության և գրության պատճենները։ Եզրափակիչ ելույթում ԱՆ ներկայացուցիչ Ներսես Զեյնալյանը նշեց, թե դատարանն առաջնորդվել է Քիշնևի կոնվենցիայով, այլ ոչ թե՝ Մինսկի, որով ի սկզբանե հայցվում էր, հետևաբար, գործողությունը, որը պետք է կատարվեր, չի կատարվել։ Դատավոր Սաֆարյանը եզրափակիչ ելույթում արձանագրեց, որ առ այս պահը ԱՆ-ն չորոշակիացրեց բոլոր հանգամանքները, չվկայակոչվեցին միջնորդությամբ նշված իրավական հիմքերը, որոնք դրվել են միջնորդությամբ, ներկայացվել են ոչ վերաբերելի հանգամանքներ։ Լսելով կողմերին՝ ԲԴԽ-ն հեռացել է խորհրդակցական սենյակ՝ որոշում կայացնելու, այն կհրապարակվի փետրվարի 24-ին։
Հեղինակ՝ Իզաբել Սահակյան

Աղբյուր` Փաստինֆո