Մայիսի 9-ին ընդառաջ Արթիկում ցանկանում են ապամոնտաժել հայրենական մեծ պատերազմին նվիրված հուշարձանը ու դրա փոխարեն շատրվան կառուցել. Ասում են՝ հովանավոր կա

Շիրակի մարզի Արթիկ համայնքում այսօր առավոտից տեղեկություններ էին տարածվել առ այն, որ Արթիկի համայնքապետարանը վերականգնման պատրվակով հայրենական մեծ պատերազմին նվիրված քաղաքի զբոսայգիներից մեկում տեղադրված հուշարձանը պատրաստվում է հանել։ Ըստ տեղեկությունների՝ հուշարձանը պետք է ապամոնտաժվի մինչև մայիսի 9-ը, իբրև թե նախատեսվում է, այն տեղափոխել մեկ այլ վայր։

Համայնքի ղեկավար Անանիկ Ոսկանյանը տարբեր հարթակներում շտապել էր հերքել, որ նման մտադրություն կա։

Դեպքի մասին ահազանգել է քանդակագործության ազգային պարկ թանգարանի տնօրեն Արթուր Գևորգյանը։ «Փաստինֆո»-ի հետ զրույցում Ա. Գեւորգյանը նշեց, որ առավոտվա ահազանգից հետո «կրուտիտների» մեջ են մտել, բայց խնդրի առնչությամբ կա հստակ ընթացակարգ, որը խախտել որեւէ մեկը չի կարող։

Նա ընդգծեց, որ ոչ համայնքապետը կամ անգամ ավագանին չեն կարող ինքնուրույն նման որոշել կայացնել և ապամոնտաժել հուշարձանը։ «Նման որոշում կարող է ընդունել կառավարությունը, բայց կառավարության որոշում չկա, եթե անգամ կառավարությունը նման որոշում կայացնի, դրանից հետո եկող կառավարությունը այդ որոշման համար իրենց դատի է տալու, ես դա հաստատ եմ ասում»,- ասաց Ա.Գեւորգյանը։

Նա նաև հայտնեց, որ մտադրություն ունեն ապամոնտաժված հուշարձանի փոխարեն շատրվաններ սարքել, դրա համար անգամ հովանավորներ են հայտնվել։ Ըստ շրջանառվող տեղեկությունների՝ հուշարձանի ապամոնտաժման համար հովանավորողները ուկրանիացի գործարարներ են։