Տխուր է, որ բժշկի գործունեությունը պատշարի աշխատանքի հետ են համեմատում

Շատ տխուր է, որ ունեմ գործընկերներ, որոնք բժշկի գործունեությունը համեմատում են պատշարի հետ,այս մասին  ԱԺ-ում Քրեական օրենսգրքով բժիշկների նկատմամբ բռնություն կատարողների պատիժը խստացնելու նախագծի շուրջ քննարկումների ժամանակ նշել է ԱԺ նախագահ, մասնագիտությամբ բժիշկ Արա Բաբլոյանը: «Բժիշկները շատ հաճախ հոգեբանական անհավասար վիճակում են լինում, ու կարող են հունից դուրս գալ: Սակայն դա չի նշանակում, որ նրան պետք է բռնության ենթարկել: Երբ սպանել են, ասենք, Շտապօգնության բժշկին, էլ ո՞վ պետք է օգնի հիվանդին: Մենք այս օրենքով չենք ասում, որ բուժաշխատողը պետք է արտոնյալ լինի, սակայն ասում ենք, որ հիվանդը նրա մոտ շատ հաճախ գալիս է նյարդային վիճակում: Ճիշտ գնահատենք այս կամ այն մասնագետի աշխատանքը»: Հարակից զեկուցող Պետաիրավական եւ մարդու իրավունքների հարցերի մշտական հանձնաժողովի անդամ Արփինե Հովհաննիսյանը իր ելույթում նախ ասաց. «Աստված բոլորիդ ու բոլորիդ բարեկամներին առողջություն տա, որ բժշկի կարիք չլինի: Մենք խոսում ենք այն արժեքի մասին, որ պաշտպանում է բժիշկը: Քր.Օր-ում կան հոդվածներ, որտեղ կան մասնագիտություններ, որոնք առանձնացված են բռնության մասով: Կոչ եմ անում կողմ քվեարկել այս նախագծի օգտին»: Բաբլոյանի խոսքով, երբ առանձնացնում ենք այս կամ այն մասնագիտությունները, մենք նրանց ոչ թե տալիս ենք արտոնություններ, որ բուժաշխատողը արտոնյալ լինի, այլ որովհետեւ նրանք աշխատում են ծանր պայմաններում. «Ինչպես կարող ենք մենք բժշկին համեմատել պատշարի ու տիեզերագնացի հետ։  Զարմանում եմ, որ կան նման մոտեցումներ մեր երկրում»,- իր ելույթում նշել է Արա Բաբլոյանը։ Նշենք, որ ԱԺ-ում քննարկվում է քննարկվում է «ՀՀ քրեական օրենսգրքում լրացում կատարելու մասին» նախագիծը առաջին ընթերցմամբ ընդունելու հարցը, որը վերաբերում է բժիշկների նկատմամբ բռնություն գործադրած անձանց պատժի խստացմանը: