Այսօր փաստացի արձանագրվեց, որ մարդիկ կարող են հանգիստ երթևեկել ՝ վճարելով 100 դրամ․ Մարության

Այսօր փաստացի արձանագրվեց, որ մարդիկ կարող են հանգիստ երթևեկել հասարակական տրանսպորտով` վճարելով ընդամենը 100 դրամ։ Այս մասին այսօր ճեպազրույցի ժամանակ ասաց Երևանի նախկին քաղաքապետ Հայկ Մարությանը։

«Ոչ մեկ իրավունք չունի խոչընդոտելու կամ թթու բառ ասելու բոյկոտ անող քաղաքացիներին, ու դա ոչ թե այն պատճառով, որ, ինչպես հայտնի խոսքում է` «սիրում ու խոնարհվում են», այլ հասկանում են` եթե սկսեն մարդկանց վատ վերաբերվել, դա կբերի մեծ բունտի»,-ընդգծեց նա։

Մարությանն ասաց, որ շատ գոհ է այսօրվա ակցիայի ընթացքից, մանավանդ շատ մարդիկ հետաքրքիր լուծումներ էին տվել` մի մասն ուղղակի 100 դրամ էր տվել, որոշներն էլ երեկ 100 դրամանոց QR տոմսեր են գնել, որոնք եռօրյա գործողության ժամկետ ունեն, նաև կային մարդիկ, որոնք ուղղակի չեն վճարել ու երթևեկել են։

«Տրանսպորտում մեծամասնությունը մասնակցում էր բոյկոտին, ինչը ողջունելի է, քանի որ հասարակությունը պատրաստ է իր իրավունքները պաշտպանելու։ Սա շատ կարևոր է հասարակության կայացման համար։ Սա ապակենտրոնացված բոյկոտ է, ու դրա գեղեցկությունն ու հարմարավետությունն այն է, որ մարդիկ պարտավոր չեն դրա համար գնալու հատուկ մի տեղ, այլ ուղղակի ապրում են իրենց կյանքով` տրանսպորտով գնում իրենց գործերով, աշխատանքի և տալիս ընդամենը 100 դրամ, ու արդյունքում տեղի է ունենում բոյկոտ»,- ասաց նա։

Նա նորմալ է համարում, որ կային մարդիկ, որոնք վճարում էին 150 դրամ։ Մարությանը միայն տեղեկացրեց, որ հաշվարկ է արել` եվրոպական տարբեր երկիրների միջին աշխատավարձը բաժանել է տրանսպորտի տարեկան տոմսերի արժեքի վրա ու արդյունքում պարզել, որ տրանսպորտի տոմսերի ամսական արժեքն ամենաթանկը Երևանում է և, օրինակ, Վիեննայից թանկ է 3 անգամ։

«Ցավում եմ, որ իշխանությունները չհասկացան, որ սա ասիական շուկա չէ, մենք կարտոֆիլ չենք վաճառում, էն որ հարցնում են` ի՞նչ արժե կարտոֆիլը, պատասխան` 300 դրամ, մենք էլ ասում ենք` դե լավ դե, մի քիչ իջի, ասենք` 150 դրամ։ Իրենք չեն հասկանում, որ մարդիկ պահանջում են 100 դրամ, քանի որ սա հազիվ այն գումարն է, որ կարողանում են տալ»,- վստահեցրեց Մարությանը։

Մարությանը տեղեկացրեց, որ երկուշաբթի` փետրվարի 3–ից, շարունակելու են տրանսպորտի թանկացման դեմ բոյկոտը։