Գյումրեցի իրավապաշտպան Կարապետ Պողոսյանն արդարացվեց

Գյումրեցի իրավապաշտպան Կարապետ Պողոսյանն արդարացվեց։ Գեղրաքունիքի մարզի ընդհանուր իրավասության դատարանը՝ դատավոր Արամ Մարտիրոսյանի նախագահությամբ, հրապարակել է արդարացման վերդիկտը՝ ճանաչելով և հռչակելով Կարապետ Պողոսյանի անմեղությունը։

Պաշտպան Արտակ Նավասարդյանը լրագրողների հետ զրույցում ասաց, որ հարցը իրավաբանության մեջ դիտարկելու դեպքում՝ արդարացումը սպասելի էր, սակայն, եթե հաշվի առնեն, որ հուզական վիճակով պայմանավորված եթերում գնահատականներ են հնչել բարձրաստիճան պաշտոնյաների վերաբերյալ, ապա որոշակի մտայնություն կար, բայց հենց դատարանի վերդիկտով այդ մտայնությունները փարատվեցին, կայացվեց այն դատական ակտը, որն իրավական առումով միակ արդարացի լուծումը կարող էր լիներ։

Հիշեցնենք, որ իրավապաշտպանը ձերբակալվել է հունիսի 5-ին՝ դեպի Գեղարքունիքի մարզ իրականացված ավտոերթի ընթացքում։ Ըստ ՔԿ-ի՝ ոստիկանները կանգնեցրել են նրա ավտոմեքենան՝ իբրև տեխզննում չունենալու պատճառով, սակայն Պողոսյանն իբրև հայհոյանքներ է հնչեցրել բարձրաստիճան պաշտոնյաների հասցեին, հաջորդիվ՝ հայհոյանքնր է հնչեցրել նաև ֆեյսբուքյան ուղիղ եթերում։ Բացի այդ, ՔԿ-ն հայտնել է՝ անձնական խուզարկությամբ իբրև հայտնաբերված հոգեմետ նյութ պարունակող «Լորազեպամ» տեսակի երեք դեղահաբի մասին։ Պաշտպանության կողմը, սակայն, հակադարձել է ՔԿ հաղորդագրությանը՝ նշելով, թե Կարապետ Պողոսյանն ընդունել է վարչական իրավախախտման փաստը, Պարեկային ծառայության աշխատակցին առաջարկել է արձանագրել խախտումը և թույլատրել շարունակել իր ճանապարհը, սակայն վերջինս հայտնել է, որ տրանսպորտային միջոցը պետք է բերման ենթարկեն հատուկ պահպանվող տարածք և արգելանք դնեն, ինչին Կարապետ Պողոսյանն առարկել է՝ հայտնելով, որ օրենսդրությամբ նման կարգ սահմանված չէ։ Այնուհետև, ըստ փաստաբանների, Կարապետ Պողոսյանը, ենթարկվել է պարեկի անօրինական պահանջին, իսկ ֆեյսբուքյան էջում եղելության մասին տեղեկացրել է հանրությանը և փաստաբաններին, իսկ բարձրաստիճան պաշտոնյայի հասցեին հայհոյանքը, որով ինքը հայտնել էր իր զայրույթը, եղել է, երբ նա և պարեկը գտնվել են միայնակ։ Պաշտպանության կողմը նաև նշել է, որ Պողոսյանը պարզաբանել էր, որ հայտնաբերված դեղահաբերը պատկանել են իր մորը, ով դա օգտագործում է բժշկական փաստաթղթերի հիման վրա։

Կարապետ Պողոսյանի նկատմամբ նկատմամբ հարուցվել է հանրային քրեական հետապնդում՝ ՀՀ քրեական օրենսգրքի 297-րդ հոդվածի 2-րդ մասի 3-րդ կետով և 396-րդ հոդվածի 1-ին մասով, և ներկայացվել է մեղադրանք: Նա մեկ ամսով կալանավորվել էր, հետագայում՝ խափանման միջոց է կիրառվել տնային կալանքը և գրավը։

Հեղինակ՝ Իզաբել Սահակյան

Աղբյուր` Փաստինֆո