Մոսկվայից վերադարձող Սարգսյանի «դիպլոմատում» ի՞նչ կա

Սերժ Սարգսյանը Ռուսաստանի նախագահ Վլադիմիր Պուտինի հրավերով այսօր աշխատանքային այցով մեկնում է Մոսկվա: Ըստ նախագահականի տարածած մամլո հաղորդագրության` Ս.Սարգսյանը հանդիպում կունենա ՌԴ նախագահ Վլադիմիր Պուտինի հետ: Ռազմավարական գործընկեր երկու պետությունների ղեկավարները բանակցությունների ընթացքում կքննարկեն հայ-ռուսական հարաբերությունների օրակարգը և երկկողմ միջպետական կապերի հետագա ամրապնդմանն ու զարգացմանը վերաբերող հարցեր: Անդրադարձ կլինի նաև Եվրասիական տնտեսական միության շրջանակներում համագործակցությանը և տարածաշրջանային արդի խնդիրներին: Սերժ Սարգսյանը և Վլադիմիր Պուտինը Մոսկվայի Տրետյակովյան պատկերասրահում կմասնակցեն «Ռուսաստանում Հայաստանի մշակութային օրերի» պաշտոնական բացման հանդիսավոր արարողությանը, որը նվիրված է ՀՀ և ՌԴ միջև դիվանագիտական հարաբերությունների հաստատման 25-ամյակին և Հայաստանի Հանրապետության ու Ռուսաստանի Դաշնության միջև Բարեկամության, համագործակցության և փոխադարձ օգնության մասին պայմանագրի ստորագրման 20-ամյակին: Նախագահ Սարգսյանը կայցելի նաև Հայ առաքելական եկեղեցու Ռուսաստանի և Նոր Նախիջևանի թեմի առաջնորդարան և Սուրբ Պայծառակերպություն Մայր տաճար, որտեղ կդիտի «Ռուսաստանում Հայաստանի մշակութային օրերի» շրջանակներում բացված՝ թեմի հիմնադրման 300-ամյակին նվիրված «Բիբլիական երկիր Հայաստան» խորագրով ցուցահանդեսը, կայցելի նաև եկեղեցական համալիրի տարածքում ներկայացված ժամանակակից հայկական խաչքարերի ցուցահանդես: Նշենք, որ երեկ Մոսկվայում գտնվող Հայաստանի արտգործնախարար Էդվարդ Նալբանդյանը հանդիպել է ԵԱՀԿ Մինսկի խմբի համանախագահներ Իգոր Պոպովին, Ստեֆան Վիսկոնտիին և Էնդրյու Շեֆերին։ Հանդիպմանը ներկա էր ԵԱՀԿ գործող նախագահի անձնական ներկայացուցիչ Անջեյ Կասպշիկը։ Արտգործնախարարության մամուլի և տեղեկատվության վարչության փոխանցմամբ՝ հանդիպմանը մտքեր են փոխանակվել ղարաբաղյան հիմնախնդրի բացառապես խաղաղ կարգավորման գործընթացի առաջմղման համար բարենպաստ պայմանների ստեղծման ուղղությամբ անհրաժեշտ քայլերի շուրջ։ Զրուցակիցները քննարկել են Վիեննայում, Սանկտ Պետերբուրգում և Ժնևում տեղի ունեցած գագաթնաժողովների ընթացքում ձեռք բերված պայմանավորվածությունների իրականացմանն ուղղված քայլերը։ Քննարկվել է առաջիկայում Հայաստանի և Ադրբեջանի արտգործնախարարների հանդիպում կազմակերպելու հնարավորությունը: Ըստ АПА ադրբեջանական լրատվական գործակալության, գալիք հինգշաբթի օրը՝ նոյեմբերի 16-ին ԵԱՀԿ Մինսկի խմբի համանախագահների հետ Մոսկվայում հանդիպում կունենա նաև Ադրբեջանի արտգործնախարար Էլմար Մամեդյարովը: Ռուսաստանյան ՏԱՍՍ լրատվական գործակալության փոխանցմամբ, առաջիկայում Ռուսաստանի արտաքին գործոց նախարար Սերգեյ Լավրովը կմեկնի նախ Հայաստան, ապա Ադրբեջան: Մինչդեռ, Ռուսաստանի արտգործնախարարի այդ տարածաշրջանային այցին ընդառաջ՝ Ադրբեջանի նախագահ Իլհամ Ալիևը հերթական անգամ կոշտ ձևակերպումներով ներկայացրել է Ղարաբաղի հարցում իր երկրի պաշտոնական տեսակետը. «Մենք որևէ փոփոխություն չենք նախատեսում մեր սկզբունքային դիրքորոշման մեջ: Հայ-ադրբեջանական ղարաբաղյան հակամարտությունը պետք է կարգավորվի մեր երկրի տարածքային ամբողջականության պահպանման սկզբունքի շրջանակում»,- ասել է Ալիևն ու հավելել. «Ուրիշ ճանապարհ չկա, մենք երբեք թույլ չենք տա մեր պատմական տարածքում ստեղծել հայկական երկրորդ պետությունը»: Նա պնդել է, որ Ադրբեջանը ցանկացած գնով կվերականգնի տարաքծային ամբողջականությունը: Ալիևի փոխանցմամբ՝ Ադրբեջանը հետևողականորեն հզորացնելու է իր զինուժը: «Համաձայն միջազգային վարկանիշների, մեր բանակն աշխարհում ամենահզոր բանակներից է, բանակին կտրվեն այնքան միջոցներ և տեխնիկա, որքան կպահանջվի, առանց սահմանափակումների»,- ասել է Ալիևը: Պաշտոնական Երևանը դեռ չի արձագանքել Ալիևի հերթական սպառնալիքներին: Ի՞նչ հայտարարություններ կհնչեն այսօր Սարգսյան-Պուտին բանակցությունների արդյունքում՝ ԼՂ խնդրի առնչությամբ... Ղարաբաղյան թեման ի՞նչ տեղ է զբաղեցնելու Պուտին-Սարգսյան բանակցություններում, ի՞նչ պայմանավորվածություններ են ձեռքբերվելու՝ Նալբանդյան-Մամեդյարով նախապատրաստվող հանդիպումից առաջ... Եվ ընդհանրապես, ինչո՞վ են վերադառնալու Սարգսյանն ու Նալբանդյանը Մոսկվայից՝ ռուս-թուրքական բանակցությունների և ալիևյան սպառնալիքների ֆոնին... Այս հարցերն են, որոնց պատասխանին պետք է առաջիկայում սպասել: Թամար Բագրատունի