Մահվան ելքով վրաերթ Երևան-Աշտարակ ճանապարհին. վրաերթի ենթարկվածը հիվանդանոցի ճանապարհին մահացել է, փնտրվում է առեղծվածային 2-րդ մեքենան. ՖՈՏՈՌԵՊՈՐՏԱԺ

Նոյեմբերի 15-ին, մահվան ելքով վրաերթ է տեղի ունեցել Երևան-Աշտարակ ավտոճանապարհի 13-րդ կմ հատվածում։ Ժամը 19։30-ի սահմաններում Երևանի բնակիչ՝ 30-ամյա Արմեն Եզոյանը իր վարած Mitsubishi Grandis մակնիշի AD-620-DA համարանիշի ավտոմեքենայով վրաերթի է ենթարկել փողոցը չթույլատրելի հատվածով անցնող, հետիոտն,Երևանի բնակիչ, 59-ամյա Սեյրան Ղարիբյանին։ Ինչպես դեպքի վայրից հայտնում է ֆոտոլրագրող Գագիկ Շամշյանը, վարորդը փախուստի չի դիմել, ահազանգել է շտապօգնություն, այնուհետև Ճանապարհային Ոստիկանության օպերատիվ կենտրոն, օգնել է վրաերթի ենթարկվածին տեղափոխել հիվանդանոց, սակայն ճանապարհին Ս. Ղարիբյանը մահացել է։ Դեպքի վայր են ժամանել Ճանապարհային Ոստիկանության 2-րդ սպայական գումարտակի 3-րդ վաշտի 1-ին դասակի ծառայողները՝ վաշտի հրամանատար Արթուր Պետրոսյանի, դասակի հրամանատար Հրանտ Գալստյանի գլխավորությամբ։ Դեպքի մասին ՃՈ 1-77 օպերատիվ կառավարման կենտրոնի պատասխանատու հերթապահ Գեղամ Մարգարյանը տեղեկությունը փոխանցել է Հայաստանի քննչական կոմիտեի Կոտայքի մարզային քնչական վարչության Նաիրիի քննչական բաժին, որտեղից ժամանել է քննչական խումբը՝ ավագ քննիչ Սամվել Քոլարյանի գլխավորությամբ, ում կողմից փաստի առթիվ հարուցվել է քրեական գործ՝ ՀՀ քր.օր-ի 242 հոդվածի 2-րդ մասի հատկանիշներով։ Քնննիչի հանձնարարականով ավտոմեքենան տեղափոխվել է Ոստիկանության Նաիրիի բաժնի պահպանվող հատուկ տարածք, իսկ վարորդը ՃՈ տեսուչ Լևոն Զազյանի ուղեկցությամբ տեղափոխվել է բժշկական կենտրոն, որտեղ պարզվել է, որ նա ավտոմեքենան վարել է սթափ վիճակում։ Ֆոտոլրագրողը հայտնում է նաև, որ դեպքի վայրում հավաքվածները ասում էին. «Ճանապարհն ամբողջովին եղել է առանց արտաքին լուսավորության, և միայն վրաերթից որոշ ժամանակ անց լույսերը միացվել են»։ Իսկ վրաերթի ենթարկվածին ճանաչում են որպես շիշ հավաքողի, ով հաճախակի էր օրվա տարբեր ժամերին «կալյասկեն» շշով բարձած ճանապարհով անցուդարձ կատարել և նշվում էր նաև, որ Grandis-ըբախվել է նրա «կալյասկային», իսկ մեկ այլ ВАЗ 2106 մակնիշի ավտոմեքենա էլ վրաերթի է ենթարկել հետիոտնին և նրան թողնելով անօգնական՝ դիմել փախուստի։ Ոստիկանությունն ու քննչական բաժինը պարզում են այս տեղեկատվության իսկությունը։ Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: Լուսանկարները` Գագիկ Շամշյանի