Թուրքիան փայլուն դիվանագիտական հաղթանակ տարավ սիրիական ճակատում

Հայաստանի համար Իրանի հետ դաշնակցական հարաբերությունները կենսական նշանակություն ունեն։ Նման հայտարարությամբ հանդես եկավ Հայելի ակումբում  Արևելագիտության ինստիտուտի գիտաշխատող, ԵՊՀ դոցենտ, արաբագետ Արաքս Փաշայանը:Ըստ նրա՝ Իրանին մեկուսացնելու քաղաքականություն է վարվում, և տրամաբանական է, որ Հայաստանին նույնպես կքարոզեն հակաիրանական տրամադրություններ։ «Սաուդյան Արաբիայի նպատակն է ամեն գնով փորձել հակազդել Իրանի և դաշնակից ուժերի առաջխաղացմանը Մերձավոր Արևելքում՝ լինի Սիրիայում, Լիբանանում, Եմենում թե այլ տեղ։ Սաուդյան Արաբիան միայնակ չէ իր այս պայքարում։ Իսրայելը և ԱՄՆ-ն նրա դաշնակիցներն են»,-նշեց արաբագետը։ Խոսելով սիրիական պատերազմից՝ արաբագետն ասաց, որ պատերազմն ավարտված համարելը սխալ կլինի, բայց այն մոտենում է իր ավարտին։ «Սիրիան թևակոխում է հետպատերազմյան ժամանակաշրջան, քանի որ սիրիական իշխանությունները հայտարարել են, որ իրենք վերահսկում են տարածքների 90 տոկոսից ավելին: Եթե չլիներ Իրանի, շիայական տարբեր աշխարհազորների և ՌԴ-ի աջակցությունը, գուցե սիրիական կառավարությանը չհաջողվեր հաղթանակ արձանագրել։ Սիրիական հասարակության տարբեր հանրույթներ աջակցում էին նախագահ Ասադին։ Հաղթանակը Սիրիայում հնարավոր եղավ նաև միջազգային ուժերի համագործակցության շնորհիվ»,- ասաց նա: Թուրքիան փայլուն դիվանագիտական հաղթանակ տարավ սիրիական ճակատում։