Վարչապետի պատասխանը Ծառուկյան դաշինքին

Այսօր Ազգային ժողովում կառավարության հետ հարցուպատասխանի ժամանակ «Ծառուկյան» խմբակցության պատգամավոր Գևորգ Պետրոսյանը վարչապետից հետաքրքրվեց, թե ինչպե՞ս է նա վերաբերվում վերջին շրջանում մամուլը ողողած ՊԵԿ-ի առանձին ներկայացուցիչների վայրագություններին:«Մամուլը հեղեղված է ՊԵԿ առանձին աշխատակիցների վայրագությունների մասին հրապարակումներով: Որպես ՊԵԿ նկատմամբ վերահսկողություն իրականացնող պաշտոնյա, խնդրում ենք կոնկրետ պարզաբանեք, թե ինչպես եք վերաբերվում նրանց վայրագություններին, մարդկանց վրաերթի ենթարկելու դեպքերին»,- հարցրեց պատգամավորը: «Եթե Դուք ուզում եք հարց տալ «Առինջ մոլի» հետ կապված, ապա մի քիչ այլ կերպ ձևակերպեք, որ ես էլ կարողանամ պատասխանել»,- ի պատասխան՝ ասաց Կ. Կարապետյանը: Պետրոսյանը նկատեց, որ ինքը կոնկրետ հարց է տվել վերջին շրջանում մամուլը ողողած դեպքերի մասին, իսկ վրաերթը տեղի է ունեցել հենց «Առինջ մոլում»: «Վայրագությունների նկատմամբ վերաբերմունքս բացասական է: Եթե կա նման դեպք, պետք է հետաքննվի և համապատասխան գնահատական տրվի: Բայց հարցը հնչում է այսպես՝ ինչպե՞ս եք վերաբերվում վայրագությանը: Ես մարդ չգիտեմ, ով վայրագությանը լավ է վերաբերում: Վայրագությունն ապացուցվելու դեպքում էդ մարդուն պատժելու եմ: Երբ որ ապացուցվի վայրագությունը, վայրագն իր պատիժը կստանա», ասաց Կարեն Կարապետյանը: