«Թույլ տվեք իմ մտածածս մեջս մնա». Վարչապետը խուսափեց պատասխանից

Ազգային ժողով-կառավարություն հարց ու պատասխանի ժամանակ այսօր Ելք խմբակցության ղեկավար Նիկոլ Փաշինյանը հարց ուղղեց վարչապետ Կարեն Կարապետյանին: Նա հիշեցրեց, որ նոյեմբերի 2-ի ասուլիսում հարցին, թե համամի՞տ է ՀՀԿ-ականների հետ, որ Սերժ Սարգսյանն անփոխարինելի է, պատասխանել էր. «Ինչ վերաբերում է Սերժ Սարգսյանի վարկանիշներին, որպես անվտանգության երաշխավոր, որպես մեծ փորձ ունեցող ղեկավար, ես այդ պնդումների հետ համաձայն եմ»: «Մենք բոլորս, և նաև Սերժ Սարգսյանը մարդ է, Աստված բոլորին երկար կյանք տա, բայց եթե անփոխարինելի մարդուն ինչ-որ բան պատահեց, մեր ազնիվ ցեղը կորչելո՞ւ է զուր տեղը: Եթե Սերժ Սարգսյանն անփոխարինելի է, ինչպե՞ս եք Դուք ակնարկում, որ գերագույն գլխավոր հրամանատարի պաշտոնում պատրաստ եք փոխարինել նրան: Արդյոք սա Ձեր կողմից դավադրությո՞ւն է ազնիվ մեր ցեղի նկատմամբ: Սա ձեզ հայտնի մի պատմություն չի՞ հիշեցնում, երբ հարևան երկրի ղեկավարը, ցույց տալով Լեոնիդ Բրեժնևին, ասում էր՝ «кто сказал что Ильич умер, вот он стоит перед вами»»,- հարցրեց Ն. Փաշինյանը: Ի պատասխան՝ Կ. Կարապետյանն ասաց, որ հիմա էլ է այն կարծիքին, ինչ հայտնել է այն ժամանակ: «Բրեժնեւի վերաբերյալ չգիտեմ ինչ պատասխանեմ»,-ասաց վարչապետը: Պարոն Փաշինյանը նկատեց, որ հարցը պարզ է. «ՀՀԿ-ում էդ պրոցեդուրան ո՞նց եք պատրաստվում անել: Եթե Շարմազանովը Սերժ Սարգսյանին առաջարկեց վարչապետի թեկնածու, դուք ինքներդ ձեզ առաջարկելու՞ եք վարչապետի պաշտոնում, թե եթե անփոխարինելի է, դուք կհամաձայնվեք 2-րդ, 3-րդ փոխվարչապետի պաշտոնին»: «Ես ինքս ինձ կառաջարկեմ, թե ոչ, թույլ տվեք իմ մտածածս իմ մեջ մնա: Հաստատում եմ նույնպես նա, որ գնահատում եմ Սերժ Սարգսյանի փորձը եւ դերակատարումը»,-թեման փակեց վարչապետ Կարեն Կարապետյանը: