«Սերժ Սարգսյանը դարձել է հայկական ավիացիայի վերջին ուղևորը». Նիկոլ Փաշինյան

Ազգային ժողովի հերթական նիստի ժամանակ «Ելք» խմբակցության ղեկավար Նիկոլ Փաշինյանը հայտարարեց, որ 2013 թվականին Հայաստանի կառավարությունն արձանագրեց բաց երկնքի քաղաքականություն, ինչը նշանակում էր, որ Հայաստանի կառավարությունը որևէ կերպ չի պատրաստվում պաշտպանել Հայաստանի ավիացիոն շուկան: Փաշինյանի խոսքով՝ «Զվարթնոց» օդանավակայանից իրականացվում է շաբաթը 206 չվերթ, որից 110-ը՝ 53 տոկոսը, իրականացնում են ռուսական ընկերություններն ու ռուսական ուղղությամբ։ «Արդյոք Հայաստանում կա՞ հայկական ավիաընկերություն, այո, «Արմենիա» անունով ավիաընկերություն կա, Մոսկվա ոչ մի թռիչք չունի, ուր թռնում է՝ փակուղային տեղեր են: Այսինքն՝ շուկան մոնոպոլիզացվել է, և մենք ասելով՝ չենք ուզում ազգային փոխադրող, ռուսական ընկերություններին դարձրել ենք ազգային փոխադրող, ու այս պրոցեսը շարունակվում է: Մենք վերջին 15 տարիներին կորցրել ենք հայկական ավիացիան: Ես ուզում եմ քաղաքական գնահատական տալ, հիշում եք, որ 2011 թվականին Սերժ Սարգսյանը հայտարարեց, որ ինքը լինելու է Երևան-Ստեփանակերտ չվերթի առաջին ուղևորը, բայց, փաստացի, Սերժ Սարգսյանը դարձել է հայկական ավիացիայի վերջին ուղևորը, որովհետև միայն նրա ինքնաթիռն է, որն իր վրա հայկական ավիացիայի ատրիբուտիկան կրում է»,- հայտարարեց Ն. Փաշինյանը: