Համաձայն եմ Դանա Ուայթի հետ․ Արման Ծառուկյանի հայտարարությունը

Խառը մենամարտերի (MMA) հայազգի մարտիկ Արման Ծառուկյանն արձագանքել է UFC-ի նախագահ Դանա Ուայթի՝ իր մասին խոսքերին։

«Համաձայն եմ Դանա Ուայթի հետ։ Մեջքս բուժելուց անմիջապես հետո պատրաստ կլինեմ ապացուցել, որ իրական համար մեկ հավակնորդն եմ՝ մենամարտելով ցանկացածի դեմ»,- գրել է Արման Ծառուկյանը։

Հիշեցնենք, որ UFC-ի նախագահ Դանա Ուայթն ասել էր, որ հայազգի մարտիկ Արման Ծառուկյանի հաջորդ մենամարտը տիտղոսային չի լինելու։

«Նա բաց է թողել հնարավորությունը։ Նրա հաջորդ մենամարտը տիտղոսային չի լինելու։ Նա պետք է նորից անցնի գոտու համար պայքարելու գործընթացը»,- նշել էր UFC-ի նախագահը։

28-ամյա Ծառուկյանն ավելի վաղ ստիպված էր հրաժարվել UFC 311-ում թեթև քաշային կարգում չեմպիոն Իսլամ Մախաչևի հետ ռեւանշ-մենամարտից՝ մեջքի վնասվածքի պատճառով։

Արմանին, ի վերջո, փոխարինել է բրազիլացի Ռենատո Մոիկանոն, որին Մախաչևը հաղթեց առաջին ռաունդում՝ հաջողությամբ պաշտպանելով չեմպիոնական տիտղոսը։