Բաղրամյանում իրավճակը շարունակվում է լարված մնալ. կա տուժած
Այսօր առավոտյան դասադուլ իրականացնող ուսանողները հավաքվելով ԵՊՀ-ի մոտ երթով շարժվել են Աժ: Նախատեսված ժամից ուշ նրանք հավաքվել են Աժ-ի Դեմիրճյան փողոցին հարող մուտքի մոտ և վանկարկել«Տարկետում լինելու Ա»: Նախաձեռնող խմբի անդամները մի քանի րոպե խորհրդակցելուց հետո ուսանողներին կոչ արեցին վերադառնալ Աժ-ի գլխավոր մուտքի մոտ և այնտեղ շարունակել ակցիան: Այդ որոշման վերաբերյալ որևէ բացատրություն չհնչեց: Դեմիրճյան փողոցից մուտք գործելով Բաղրամյան պողոտա ուսանողները փակեցին երթևեկության մի գոտին: Իրավիճակը լարվել է, մեծ թվով ոստիկաններ են ժամանել, փորձում են ուսանողներին հեռացնել փողոցի երթեւեկելի մասից: Տեղում է ՀՀ ոստիկանության Երևան քաղաքի վարչության պետի տեղակալ, ոստիկանության գնդապետ Վալերի Օսիպյանը: Վերջինս ուսանողներին 5 րոպե ժամանակ տվեց փողոցն ազատելու համար: Իրավիճակը լարվել է. ոստիկաններն անցել են ուժի գործադրման: Նրանք փորձում են ցուցարար ուսանողներին ուժով հեռացնել տեղանքից: Արդյունքում մասնակիցները մեկը ընկել է գետնին և վնասվածքներ ստացել: Երեւանի փոխոստիկանապետ Վալերի Օսիպյանը լրագրողների հետ զրույցում ասաց, որ ոստիկանության գործողությունները ուժ կիրառելու հարցում, համաչափ են եղել: Դիտարկմանը, որ կան վնասվածք ստացած ուսանողներ, Վալերի Օսիպյանն ասաց, որ կարող են դիմել իրենց եւ ըստ վերադասության սկզբունքի դեպքին ընթացք կտրվի:
Հետևեք մեզ Viber-ում
