Երևանը՝ բետոնե անտառ. ինչպես են ծառահատումներն ու շինարարությունը կլանում քաղաքը

Երևանը, որ հայտնի էր իր կանաչ պուրակներով ու հարմարավետ բակերով, նաև անտառներով, այժմ վերածվում է բետոնե անապատի։ Ծառահատումների ահռելի տեմպերը, անհաշվենկատ շինարարությունը և կանաչ տարածքների կրճատումը հանգեցրել են մի վիճակի, երբ քաղաքն այլևս չի կարողանում լիարժեք շնչել։

Վերջին տարիներին Երևանում բազմաթիվ կանաչ տարածքներ զոհաբերվեցին շինարարական ծրագրերի համար։ Այգիները, բակերը և փողոցների երկայնքով տեղադրված ծառերը, որոնք նախկինում ծառայում էին որպես բնական ֆիլտր, կտրուկ նվազեցրին։ Յուրաքանչյուր ծառահատում բերում է օդի որակի վատթարացման, քանի որ ծառերը կարևոր դեր ունեն փոշու, ածխաթթու գազի կլանման և թթվածնի արտադրման գործում։

Ըստ բնապահպանների՝ մի ծառի աճը տևում է տասնամյակներ, բայց այն կարելի է կտրել հաշված րոպեների ընթացքում։ Եթե այդ ընթացքը շարունակվի, Երևանը լիովին կկորցնի իր երբեմնի կանաչ տարածքները։

Շինարարության անսահմանափակ աճը երկրորդ հարվածն է Երևանի շրջակա միջավայրին։ Կանգնեցնում են բարձրահարկ շենքեր, հաճախ՝ առանց ուշադրություն դարձնելու շրջակա միջավայրի պահպանությանը։ Կանաչ գոտիներին գալիս են փոխարինելու բետոնե շինությունները՝ զրկելով բնակիչներին հարմարավետությունից և մաքուր օդից։

Բետոնը նաև տաքացնում է քաղաքը՝ ստեղծելով «քաղաքային ջերմային կղզու» էֆեկտ։ Օդի ջերմաստիճանը բարձրանում է, փոշու և աղտոտվածության մակարդակը՝ նույնպես։ Այս ամենը խթանում է շնչառական խնդիրների աճը, ինչն ազդում է թե՛ երեխաների, թե՛ մեծահասակների առողջության վրա։

Երևանն ունի քաղաքաշինական համակարգված մոտեցման կարիք, որտեղ առաջնահերթություն պետք է տրվի շրջակա միջավայրի պաշտպանությանը։ Անհրաժեշտ է անհապաղ ձեռնարկել հետևյալ քայլերը.

1․ Կանաչ գոտիների վերականգնում

Պետք է տնկել նոր ծառեր և վերակառուցել այգիները, նույնիսկ եթե դա ժամանակատար և ծախսատար է։

2․ Շինարարական սահմանափակումներ

Նոր շինարարական նախագծերը պետք է խստորեն անցնեն բնապահպանական փորձաքննություն։

3․ Հանրային իրազեկում

Անհրաժեշտ է, որ բնակիչներն իրազեկվեն ծառերի պահպանության կարևորության մասին և ներգրավվեն կանաչապատման ծրագրերում։

Եթե այս պահին կանգ չառնենք և չդիմենք ակտիվ միջոցների, Երևանը կկորցնի իր պատմական գեղեցկությունը և կդառնա անապահով և անհարմար բնակավայր։ Ծառահատումները և բետոնե ծածկույթները միայն կխորացնեն ճգնաժամը, իսկ մենք՝ բնակիչներս, կկորցնենք մեր առողջ ապագայի հնարավորությունը։

«Մայր Հայաստան»-ի գործողություններն ուղղված են նաև Երևանը վերակենդանացնելուն, որպեսզի մեր մայրաքաղաքը նորից դառնա կենսունակ, շնչող և կանաչ քաղաք՝ ինչպիսին որ էր ժամանակին:

#միացի'ր_որ_փոխենք

Լուսանկարը` Ֆոտոլուրի

«Մայր Հայաստան» դաշինքի անդամ Սոնա Աղեկյանի ֆեյսբուքյան էջից