Ռուսաստանից բացի չկա մի երկիր, որը Հայաստանում ունի գոնե կես միլիարդ դոլարի ներդրում․ Մեսրոպ Առաքելյան

«Բալանսավորված քաղաքականության կարևորագույն բաղադրիչներից մեկը օտարերկրյա ներդրումներն են»,-արձագանքելով Նիկոլ Փաշինյանի հայտարարությանը՝ գրել է նրա նախկին խորհրդական Մեսրոպ Առաքելյանը։

Տնտեսագետը շարունակում է.

«Այսինքն ինչքան է երկիրը գրավիչ և վստահելի այլ երկրների ներդրողների համար։ Սրանով են իրական կյանքում պետությունները «ապացուցում» իրենց գործընկերությունը։

Այս մասով պատկերը խիստ մտահոգիչ է և չկա որևէ նախադրյալ, որ տեսանելի ապագայում օտարերկրյա ներդրումների մասով դրական սպասելիքներ ենք արձանագրելու։

Եվ այսպես, վերջին 35 տարում Հայաստանում կատարված օտարերկրյա ուղղակի ներդրումների ծավալը (այս պահին առկա մնացորդը) կազմում է 5,45 մլրդ դոլար։ Սա կազմում է 35 տարվա ՀՆԱ-ի ընդամենը 1,9 %-ը, ինչը պարզապես ծիծաղելի թիվ է։

Սրանից ավելի քան 1 մլրդ դոլարի ներդրումները օֆշորային երկրների կողմից են, որոնց մեծ մասն իրականում հայկական ծագում ունեն։

Պատկերը մտահոգիչ է, ոչ միայն ներդրումների համամասնության մասով, այլ նաև բացարձակ թվերով՝ Հայաստանի համար գործընկեր երկրների կողմից։

. Ռուսաստանի կողմից առկա ներդրումների ծավալը կազմում է 2 մլրդ դոլար՝ ընդանուր ներդրումների 37%-ը։ Ռուսաստանից բացի չկա մի երկիր, որը Հայաստանում ունի գոնե կես միլիարդ դոլարի ներդրում։
. Ֆրանսիայի ներդրումները կազմում են 367 մլն դոլար։
. ԱՄՆ ներդրումները կազմում են 224 մլն դոլար։
.Իրանի ներդրումները կազմում են 0,2 մլն դոլար։
. Վրաստանի ներդրումները կազմում են 1,8 մլն դոլար։
.Չինաստանի ներդրումները կազմում են 0,8 մլն դոլար։

Այս թվերը խոսում են այն մասին, որ Հայաստանի նկատմամբ գործընկերային հարաբերությունները հեռու են իրականությունից, ինչը նախ և առաջ տասնամյակներով մեր արտաքին և տնտեսական սխալ քաղաքականության հետևանքն է։

Միջազգային ասպարեզում լուրջ և վստահելի գործընկերոջ համբավ ձեռքբերելու համար պետք է ունենալ առնվազն 10 գործընկեր երկիր, որոնցից յուրաքանչյուրը Հայաստանում կունենա առնվազն 1 մլրդ դոլար ներդրում, իսկ դրա համար անհրաժեշտ է արմատապես փոխել տնտեսական և արտաքին քաղաքականության բովանդակությունը»