Պետք չէ հանրությանը ներկայացնել, թե սա նշանակում է ԱՄՆ կողմից ՀՀ-ին տրամադրվող երախիքային ինչ-որ բան․ Սուրեն Սարգսյան
Հայաստանի արտաքին գերատեսչությունն այսօր տեղեկացրեց՝ Վաշինգտոնում սպասվում է ՀՀ ԱԳ նախարար Արարատ Միրզոյանի և ԱՄՆ պետքարտուղար Էնթոնի Բլինքենի կողմից ՀՀ-ԱՄՆ ռազմավարական գործընկերության մասին փաստաթղթի ստորագրումը։
Ի դեպ, փաստաթղթի հնարավոր ստորագրման մասին ավելի վաղ շրջանառվող խոսակցություններում հանրային տարբեր շրջանակներ այդ իրողությունը հատկապես կարևորում էին տարածաշրջանի վերջին զարգացումների, Բաքվից հնչող սպառնալիքների համատեքստում։
168․am-ը Ամերիկյան հետազոտությունների հայկական կենտրոնի նախագահ, միջազգայնագետ Սուրեն Սարգսյանից հետաքրքրվեց՝ արդյո՞ք ստորագրվելիք ռազմավարական գործընկերության փաստաթուղթն ինչ-որ առումով կարող է զսպել Ադրբեջանին։
Ի պատասխան՝ միջազգայնագետը նկատեց․ «Այդ զսպիչ ֆունկցիան կարող է ունենալ բացառապես քաղաքական նշանակության տեսանկյունից և ոչ թե՝ ռազմավարական, ռազմական, կամ այլ տեսանկյունից։
Բայց կարծում եմ, որ այս փաստաթուղթը դրա մասին չէ, և պետք չէ հանրությանը ներկայացնել, թե սա նշանակում է ԱՄՆ կողմից ՀՀ-ին տրվող երաշխիքային ինչ-որ բան։ Պետք չէ այս սխալ սպասումները ձևավորել մեր հանրության շրջանում․ խոսքն այստեղ բացարձակապես ռազմավարական դաշնակցային հարաբերությունների մասին չէ, այլ ռազմավարական երկխոսության ստատուսից հետո ԱՄՆ կողմից ստացած մեր հաջորդ ստատուսն է՝ ռազմավարական գործընկեր, որն անվտանգային երաշխիքների մասով որևէ բան չի տալիս»։
Հարցին, թե հեռացող Բայդենի վարչակազմին ինչո՞ւ էր հենց այս պահին պետք նման փաստաթղթի ստորագրումը, քանի որ հասկանալի է՝ փաստաթղթի ստորագրումը միայն ՀՀ ցանկություններից չէ, որ կախված է, Սուրեն Սարգսյանը պատասխանեց հիշեցմամբ, որ ՀՀ-ն, այդուհանդերձ, ԱՄՆ արտաքին քաղաքականության մեջ բավականին ակտիվ տեղ է զբաղեցրել։
Ըստ նրա՝ Ջո Բայդենը փորձում է ամփոփել ՀՀ-ի հետ երկկողմ հարաբերությունները՝ տալով այս կարգավիճակը։
«Բայդենի վարչակազմը տրամաբանական ավարտին է հասցնում Հայաստանի նկատմամբ իր քաղաքականությունը, որը կարելի է համարել ՀՀ և ԱՄՆ միջև ռազմավարական գործընկերային հարաբերությունների ձևավորում։ Իսկ թե ինչպիսին կլինի դա ապագայում, և ինչպես մենք կաշխատենք Թրամփի վարչակազմի հետ այս ծրագրի իմպլեմենտացիան ապահովելու համար, կախված է բացառապես արտաքին քաղաքականության մեջ անելիք ունեցողների ունակություններից»,- հավելեց միջազգայնագետը։
Ի վիճակի՞ են, ըստ ձեզ՝ մեր վերջին հստակեցմանն էլ նա արձագանքեց․ «Ժամանակը ցույց կտա, բայց, համենայն դեպս, այսքան ժամանակ աչքի չեն ընկել մեծ ունակություններով ու բացառիկ դերակատարմամբ»։
Ավելի վաղ միջազգայնագետ Սուրեն Սարգսյանը, իր ֆեյսբուքյան էջում թեմային անդրադառնալով, մասնավորապես նշել էր , որ այս կարգավիճակի ստացումը տրամաբանական շարունակությունն է ռազմավարական երկխոսության կարգավիճակի, ապա հիշեցրել՝ Վրաստանը դեռևս 2009թ. ուներ ռազմավարական գործընկերոջ կարգավիճակ ԱՄՆ հետ․ «Թե ինչ տեղի ունեցավ այդ կարգավիճակի հետ, բոլորս գիտենք»:
Սուրեն Սարգսյանը նաև պարզաբանել էր, որ ռազմավարական գործընկերություն չի նշանակում ռազմավարական դաշնակցային հարաբերություն՝ ինչպիսիք են ԱՄՆ-Իսրայել, կամ ԱՄՆ-Մեծ Բրիտանիա հարաբերությունները:
Հետևեք մեզ Viber-ում
