«Դա ճիշտ ճանապարհ չէ». պաշտպանության փոխնախարար

«Զինվորական ծառայության և զինծառայողի կարգավիճակի մասին» Հայաստանի Հանրապետության օրենքում լրացում կատարելու մասին օրենքի նախագծի ամփոփիչ ելույթում պաշտպանության փոխնախարար Արտակ Զաքարյանը նշեց, թե տպավորություն է՝  սա տարկետումը վերացնելու օրենք է, սակայն համալիր լուծում է տրվում տարբեր խնդիրների, որոնք կուտակվել են տարիների ընթացքում ու բոլորի աչքի առաջ: «Ես տեղյակ եմ, որ օրենքից դժգոհ մի քանի ուսանողներ հացադուլ են սկսել: Կոչ եմ անում մեր երիտասարդներին դադարեցնել հացադուլը, որովհետև դա ճիշտ ճանապարհ չէ, և այս օրենքն էլ այն օրենքը չէ, որի դեմ կարելի է ամեն գնով պայքար մղել:  Մենք հաշվի կառնենք բոլոր առաջարկները, կտեսնենք, թե որքանով են կիրառվող մեխանիզմներն արդյունավետ: Մենք գիտության և կրթության զարգացմանը խոչընդոտող որևէ նախաձեռնություն չենք ներկայացրել, և այս օրենքն էլ դրան չէ միտված»,-նշեց Զաքարյանը: Հարցին, արդյոք խուսափել ցանկացողները չեն կարողանալու նոր օրենքով կրկին խուսափել՝ օգտվելով կառավարության որոշմամբ տաղանդավոր անձանց տարկետում տալու հնարավորություններից, Զաքարյանը պատասխանեց. «Տեսեք, ենթադրենք կառավարությունը պետք է Արտակ Զաքարյանի որդուն՝ որպես տաղանդավոր ջութակահար, տարկետում տա: Մենք կառաջարկենք այս որոշումը ընդունումից մեկ ամիս առաջ դարձնել հրապարակային: Հանրությունն արդեն վերահսկողություն իրականացնելու հնարավորություն կստանա, իսկ նրա տաղանդավոր լինել կամ չլինելը կորոշեն մասնագետները»,- նշեց փոխնախարարը: