Տնօրենն այդ ձևով չպետք է ինքնապաշտպանվեր. Ա. Բախշյանը՝ դպրոցի սկանդալի մասին

Ջոն Կիրակոսյանի անվան դպրոցում 7-ամյա երեխայի նկատմամբ տեղի ունեցած բռնությանը երեկ արձագանքել էր դպրոցի տնօրեն Անահիտ Խոսրովյանը: Դպրոցի տնօրենն այս ամենը համարել էր երեխայի ֆանտազիայի արդյունք, ապա մանրամասնել՝ այս ամենը ամուսնալուծված ծնողների հարաբերությունների պատճառով է: Որքանո՞վ է ճիշտ, երբ դպրոցի տնօրենը աշակերտի ընտանեկան հարաբերություններն է հանրայնացնում, եւ, ի վերջո, ինչ քայլեր պետք է ձեռնարկել. Araratnews.am-ը զրուցեց Երևանի ավագանու «Ելք» խմբակցության անդամ, Դ.Դեմիրճյանի անվան 27-րդ դպրոցի նախկին տնօրեն Անահիտ Բախշյանի հետ: Տիկի՛ն Բախշյան, ի՞նչ գնահատական կտաք Ջոն Կիրակոսյանի անվան դպրոցի տնօրեն Անահիտ Խոսրովյանի մեկնաբանությանը: Եթե Դո՞ւք լինեիք նրա փոխարեն, կհանրայնացնեի՞ք աշակերտի ընտանեկան հարաբերությունները: Ես լավ ճանաչում եմ Անահիտ Խոսրովյանին՝ որպես սրտացավ, կրթությունը լավ կազմակերպող տնօրենի: Դժվարանում եմ ասել՝ եթե իր տեղում լինեի, այդ պահին ինչ կպատասխանեի: Բայց չէի խորանա ընտանիքի պատմության մեջ, քանի որ դա այդ երեխայի անձնական դաշտն է: Մանկավարժը, իհարկե, պարտավորություն ունի մտնելու այդ դաշտ, քանի որ նա երեխայի դաստիարակության, կրթության շտկողն է: Սակայն ես չէի բարձրաձայնի երեխայի ընտանեկան հարաբերությունները, կփորձեի այլ ճանապարհ գտնել: Ես չեմ հավատում, որ առաջին դասարանցիներն ընդունակ են այդպիսի բարբարոսության: Անահիտ Խոսրովյանը, կարծում եմ, այդ ձեւով չպետք է ինքնապաշտպանվեր, նա մանկավարժական, հոգեբանական քայլեր պետք է աներ: Կարծում եմ՝ հասարակական ճնշման տակ Անահիտի ինքնապաշտպանության զգացումն է խոսել: Սակայն եկեք չդատենք, երեխաների արժանապատվությանը չդիպչելու տեսակետից եկեք էլ չխոսենք այս դեպքի մասին: Ամեն մարդ թող իր գործով զբաղվի: Անահիտը ձեւը կգտնի այդ երեխաների հետ աշխատելու: Խոսք չի կարող լինել որեւէ մեկին հեռացնելու մասին: Նկատի ունեք՝ դպրոցի տնօրենին հեռացնելո՞ւ: Ո՛չ, աշակերտներին: Մայրը պահանջում է այդ երեխաներին հեռացնել, ինքն էլ իր երեխային է ուզում հեռացնել: Ո՛չ նա պիտի նման բան անի, ո՛չ էլ մյուս աշակերտներին պետք է հեռացնել: Դպրոցը ձեւը կգտնի այդ հարցը լուծելու, որովհետեւ դպրոցում լավ թիմ կա՝ լավ հոգեբան, մանկավարժ: Այնպիսի աղմուկ են բարձրացրել, կարծես չգիտեմ ինչ է եղել: Որովհետեւ շատերի կողմից չընդունված նաև ներառական կրթությունն են քննադատում: Շատ իզուր, որ քննադատում են: Ներառական կրթությունն այդ դպրոցում լավ հիմքերի վրա է: Պատահական չէ, որ մայրն իր երեխային այդ դպրոցն է բերել: Մայրն էլ պիտի տեսնի իր սխալները, դառնա թիմի անդամ, մասնակցի իր երեխային կրթության համար անհրաժեշտ գործընթացին: Տիկի՛ն Բախշյան, Ձեզ համար պա՞րզ է` ի՛նչ է կատարվել դպրոցում՝ համադրելով դպրոցի տնօրենի պարզաբանումն ու ծնողի բողոքը: Չեմ կարող ասել: Չեմ հավատում, որ երեխաներն այդպիսի բարբարոսներ են: Ոչ էլ ոստիկանները պետք է խառնվեն, գիտեք՝ ի՞նչ վնաս են հասցնում երեխաներին: Դպրոցն ունի հոգեբան, մանկավարժ: 6 տարեկան երեխաներին տարել են հարցաքննության, ի՞նչ իրավունքով: Ծնողն է ասել, որ դիմելու է ոստիկանություն: Ուրեմն այդ ծնողի հետ պետք է աշխատել: Առաջին հերթին նա՛ ներառական կրթության կարիք ունի: