Անչափահասների մասնակցությամբ վիճաբանություն՝ Դիլիջանի քաղաքային զբոսայգում․ բժիշկները պայքարում են 16-ամյա տղայի կյանքի համար

SHAMSHYAN.com-ի տեղեկություններով՝ երեկ՝ հունվարի 8-ին, անչափահասների մասնակցությամբ ծեծկռտուք է տեղի ունեցել Դիլիջան քաղաքում։

Ինչպես հայտնում է ֆոտոլրագրող Գագիկ Շամշյանը, ժամը 17։30-ի սահմաններում ծայրահեղ ծանր ախտորոշմամբ անգիտակից վիճակում Դիլիջանի քաղաքային զբոսայգուց «Դիլիջան» բժշկական կենտրոն է տեղափոխվել մի երեխա։

Հիվանդանոց է մեկնել ոստիկանության Դիլիջանի բաժնի հերթապահ խումբը՝ համայնքային ոստիկանության ավագ տեսուչի գլխավորությամբ։

Տեղում բժիշկները ոստիկաններին հայտնել են, որ երեխան ի վիճակի չէ կատարվածի մասին բացատրություն տալու, քանի որ գտնվում է վիրահատարանում, որից հետո երեխային տեղափոխել են Երևանի մասնագիտացված հիվանդանոցներից մեկը։

Մինչ համայնքային ոստիկանները փորձում էին պարզել երեխայի ինքնությունը Դիլիջանի հիվանդանոցում պարզել են, որ նա Դիլիջան խոշորացված համայնքի վարչական բնակավայրերից մեկի բնակիչ 16-ամյա Ալեքս Գ․-ն է։

Երեխայի ինքնության այս տեղեկությունը Դիլիջանի հիվանդանոցից հայտնել են ոստիկանության Դիլիջանի բաժին։

Մինչ Դիլիջանի ոստիկանները փորձում էին պարզել նաև որտեղ և ինչ հանգամանքներում է երեխան վնասվածքներ ստացել, ՀՀ Ներքին գործերի նախարարության ոստիկանության քրեական ոստիկանության գլխավոր վարչության Տավուշի մարզի քրեական ոստիկանները՝ վարչության պետ Ռոբերտ Պետրոսյանի գլխավորությամբ պարզել են, որ նույն օրը՝ ժամը 17։00-ի սահմաններում, Դիլիջանի քաղաքային զբոսայգում Ալեքս Գ․-ին ծագած վիճաբանության ժամանակ մարմնական վնասվածքներ է պատճառել է Տավուշի մարզի բնակիչ 17-ամյա Նորիկ Հ․-ն և ըստ քրեական ոստիկանությունում ստացված օպերատիվ տեղեկությունների այդ ամենին մասնակցել է նաև Տավուշի մարզի բնակիչ 17-ամյա Հրաչ Ա․-ն։

Տավուշի մարզի քրեական ոստիկանները տեղեկությունը փոխանցել են համայնքային ոստիկանության Դիլիջանի բաժին, որպեսզի ձեռնարկեն անհրաժեշտ օպերատիվ հետախուզական միջոցառումեր նշված անձանց հայտնաբերելու ուղղությամբ։

Ֆոտոլրագրողի տեղեկություններով Ալեքս Գ․-ն արդեն տեղափոխվել է Երևանի մանկական հիվանդանոցներից մեկը, որտեղ բժիշկները պայքարում են նրա կյանքի համար։

Դեպքի փաստով ՀՀ Քննչական կոմիտեի Տավուշի մարզային քննչական վարչության Դիլիջանի քննչական բաժնում նախաձեռնվել է քրեական վարույթ։

Այսօր՝ հունվարի 9-ին, Դիլիջանում ֆոտոլրագրողի հետ զրույցում մի քանի քաղաքացիներ, ովքեր հրաժարվեցին տեսախցիկի առաջ խոսել, ասում էին․

«Սաղ Դիլիջանն է խոսում, որ էս վիճաբանությունը մի ժամից ավել տևել է ու այդ մասին իմացել են Դիլիջանի ոստիկանության թաղայինները, բայց ոչ էլ բարեհաճել են գան էդ ամենը կանխեն։ Եթե նրանք տեղում լինեին ու օպերատիվ արձագանքեին, մի անգամից կարային դրա դեմն առնեին, իսկ հիմա երեխան ծայրահեղ ծանր ընկել է բժիշկների ձեռքը, ու նրանք ամեն ինչ անում են, որպեսզի երեխայի կյանքը փրկեն։ Դիլիջանում կարծես ոստիկանությունը տեղում չլինի։ Թողնես մենակ գլուխ գովան, թե անտառահատումների դեմն են առնում։ Անտառահատումների դեմը պարեկները լավ էլ առնում են։ Դուք ձեր գործով զբաղվեք, կանխեք ու նախականխեք նման դեպքերը, որ երբ երեխաները չնչին բանից տաքանում են իրար են «մորթում» կինոյի նման թաղայինները գալիս հարց ու փորձ են անում, ով ինչ է տեսել, ինչ լսել։ Մենք հիմա մեր քաղաքում տեսնում ենք, որ համայնքային ոստիկանները տեղում դոփում են, ինչի պատճառով էլ մեր երբեմնի անվտանգ քաղաքը դառնում է վտանգավոր»։