«Արա, ձեր մեջ որտեղի՞ց էդքան պոլիտբյուրո». «Ծառուկյան»-ի պատգամավորների բողոքը

ԱԺ այսօրվա նիստին «Ծառուկյան» խմբակցության պատգամավոր Տիգրան Ուրիխանյանը շարունակեց իր կուսակիցների բարձրացրած խնդիրները՝ ՓՄՁ ոլորտում հարկային վարչարարության հետ կապված՝ նախապես նշելով, որ խոսելու է բացառապես օրակարգի շրջանակներում: Նա առաջարկեց օրակարգում ներառել ՊԵԿ-ի հետ կապված հարցը եւ քննարկել տոնավաճառների աշխատակիցների խնդիրը. «Ես նաեւ առաջարկում եմ՝ ՊԵԿ-ի հետ դուրս գալ փողոց, շրջել բոլոր այն վայրերով, որոնք ես մատնացույց կանեմ, մենք կքննարկենք երկրում առկա կոռուպցիոն համակարգը, որը Կառավարությունը շրջանցում է եւ կտեսնենք՝ ինչ նպատակներից ելնելով է ահաբեկում այդ 3000 մարդուն, որոնք մեզ դիմել են եւ մյուսներին՝ իրենց հերթին»: Վահե Էնֆիաջյանն ասաց, որ առեւտրականները 4 խմբակցությունների գրություն են փոխանցել, արդեն 7-րդ անգամ են այդ մարդիկ հավաքվում եւ հայտարարում են, որ իրենց նկատմամբ չարաշահումներ են լինում, խուզարկություն է իրականացվում՝ ստուգումների անվան տակ. «Ի՞նչ է նշանակում, որ տնտեսվարող սուբյեկտի մոտից առեւտուր արած պայուսակն են ստուգում, խուզարկություն է դա»: Տիգրան Ուրիխանյանն էլ ասաց. «Ցիտում եմ գործող վարչապետին՝ բա մենք ամենալիբերալ ազգն ենք, արա, ձեր մեջ որտեղի՞ց էդքան պոլիտբյուրո»: Նա առաջարկեց, որ ՊԵԿ նախագահ Վարդան Հարությունյանի հետ հենց հիմա դուրս գան փողոց, շրջեն եւ տեսնեն, թե ինչպես են իրենց գոյությունը քարշ տվող քաղաքացու նկատմամբ կոշտ վարչարարություն իրականացնող հարկային տեսուչները ահաբեկում առեւտրականներին: Իվետա Տոնոյանն էլ ասաց, որ եթե խնդիր են դրել հայաթափել Հայաստանը, արտագաղթի տեմպերը մեծացնել, ապա հրաշալի կերպով կառավարությունն այդ խնդիրը լուծում է: Նա առաջարկեց, որ հարկային մարմինները նախ սկսեն իրենց պատկանող ձեռնարկությունները ստուգել, այդպես ավելի ազնիվ կլիներ: «Ծառուկյան» խմբակցության մյուս պատգամավոր Արարատ Զուրաբյանն իր հերթին առաջարկ ուներ՝ անցկացնել արտահերթ նիստ ու ՓՄՁ-ների հարցը ներառել օրակարգ. «Մի բան չպետք է մոռանալ՝ եթե հասարակության մի քանի հազար հոգուն մտահոգող խնդիր կա, դրանցից ԱԺ-ն խուսափելու կամ փախչելու իրավունք չունի: Բա ինչի՞ համար ենք այստեղ. կարո՞ղ է մենք այստեղ ենք, որպեսզի դակենք Կառավարության բերած որոշումներն ու գնանք տուն: Եկեք գոնե մի անգամ նորմալ մոտենանք այս հարցերին: Ինչ-որ մարդկանց ջեբկիրությունը թարգել է պետք: Վերջացրեք, այ մարդ»: «Արտահերթ նիստ եք ուզում, 50 հազար ստորագրությունը բերեք, պաժալուստա, անենք: Մեռնեմ օրենքին»,- արձագանքեց ԱԺ փոխնախագահ Էդուարդ Շարմազանովը: