Գագիկ Սարգսյանը կշարունակի մնալ կալանավորված

ՀՅԴ անդամ Գագիկ Սարգսյանը կշարունակի մնալ կալանքի տակ: Երևանի ընդհանուր իրավասության քրեական դատարանը` դատավոր Արմինե Մելիքսեթյանի նախագահությամբ, բավարարել է Գագիկ Սարգսյանի կալանքի ժամկետը ևս երեք ամսով երկարացնելու մասին դատախազի միջնորդությունը: Դատարանը երկարացրել է նաև մեղադրյալներ Արշամ Գալստյանի և Վահագն Հովհաննիսյանի խափաման միջոց կալանքի ժամկետները` ևս երեք ամսով, միևնույն ժամանակ, դատարանը բավարարել է նրանց հաղորդակցման իրավունքի սահմանափակման միջնորդությունը: Նշենք, որ հաղորդակցման սահմանափակումները կիրառելու հիմքը եղել է այն հանգամանքը, որ կալանքի տակ գտնվելու պայմաններում Արշամ Գալստյանի մոտ` խցում, հայտնաբերվել էր բջջային հեռախոս:

Հիշեցնենք, որ 2024թ մարտի 13-ին ԱԱԾ հատուկջոկատայինները ներխուժել են Գագիկ Սարգսյանի տուն, և, ինչպես հայտնել է նրա որդին, խուզարկել են տունը, տակնուվրա արել ամբողջությամբ, ապա՝ ձերբակալել։ Ավելի ուշ հայտնի դարձավ, որ Գագիկ Սարգսյանը ձերբակալվել, ապա կալանավորվել է «ՔՊ»-ական Գագիկ Մելքոնյանի և ՔՊ գրասենյակի մոտ պայթուցիկ նյութերի հայտնաբերման դեպքով, որը ՔԿ-ն որակել է որպես ահաբեկչական գործողություն։ Այդ գործով հետապնդում է իրականացվում ևս երեք անձի նկատմամբ, որոնցից երկուսը կրկին կալանավորված են։ Քրեական գործն այժմ գտնվում է Երևանի ընդհանուր իրավասության քրեական դատարանի դատավոր Ա. Մելիքսեթյանի վարույթում: Մեղադրյալի աթոռին են Գագիկ Սարգսյանը, Արշամ Գալստյանը և Վահագն Հովհաննիսյանը:

Հեղինակ՝ Իզաբել Սահակյան

Աղբյուր` Փաստինֆո