Բալթյան դասեր նրանց, որ փորձում են հայ-ռուսական՝ էներգետիկ ոլորտում կապերը բերել անկանխատեսելի դաշտ․ Վահե Դավթյան

Քաղաքական գիտությունների դոկտոր, պրոֆեսոր, էներգետիկ անվտանգության փորձագետ Վահե Դավթյանը ֆեյսբուքյան իր էջում գրել է․

ԲԱԼԹՅԱՆ ԴԱՍԵՐԸ

Ռուսական էներգահամակարգից անջատվելուց հետո կտրուկ աճել են Բալթյան երկրների էլեկտրաէներգիայի սակագները:
Դեկտեմբերի 27-ին Nord Pool բորսայում էլեկտրաէներգիայի միջին օրական գինը Էստոնիայի համար բարձրացավ մինչև 14,2 ցենտ 1 կՎտ.ժ-ի համար, ինչը մոտ 50 անգամ գերազանցում է Ֆինլանդիայում գործող սակագինը:

Լատվիայում և Լիտվայում էլեկտրաէներգիայի միջին գինը կլինի նույնը, ինչ Էստոնիայում:
Զուգահեռները Ֆինլյանդիայի հետ պայմանավորված են մեկ պարզ հանգամանքով՝ Ֆինլյանդիան ունի ատոմային էներգետիկա՝ մոտ 4300 ՄՎտ գումարային հզորությամբ: Եվ ի տարբերություն Լիտվայի, Ֆինլյանդիան ոչ միայն չհրաժարվեց սեփական ատոմային հզորություններից, այլ նախաձեռնեց նորերի ստեղծումը:

Այս իրավիճակը հատկապես կարևոր է գիտակցել բոլոր նրանց, ովքեր արկածախնդրորեն փորձում են հայ-ռուսական ռազմավարական կապերը, այդ թվում՝ էներգետիկայի ոլորտում, բերել առնվազն անկանխատեսելիության տիրույթ:
Ամեն դեպքում, մեզ հետ արդեն բավականին անկեղծ են խոսում: Հիշու՞մ եք ԵԱՀԿ-ում ԱՄՆ նախկին դեսպան Դեն Բայերի հայտարարությունն այն մասին, որ ՛՛հայերը պետք է պատրաստ լինեն մի քանի ցուրտ ձմեռներ՛՛ անցկացնել:

Հավանաբար, նույն մեթոդականով է օգտվում նաև Մոլդովայի կառավարության մամլո խոսնակը, ով համարում է, որ էլեկտրաէներգիայի սակագների բարձրացումը պետք է դիտարկել որպես ՛՛ազատության համար վճարվող գին՛՛:

Միայն թե բոլոր այս հռետորները մոռանում են այն մասին, որ եթե ՛՛ազատությունը՛՛ խիստ սուբյեկտիվ ու վերացական քաղաքական կատեգորիա է, ապա սակագներն ունեն հստակ չափում: