Հերթական խոշոր վթարը՝ Նոր Երզնկա գյուղի կամարի հարևանությամբ. 3 տուժածներից մեկին շտապ տեղափոխել են Երեւան

Այսօր առավոտյան Արագածոտնի մարզում տեղի ունեցած վթարից տուժած տղամարդուն Աշտարակի ԲԿ-ից շտապ տեղափոխել են Երեւան։

Ինչպես արդեն հայտնել ենք՝ դեկտեմբերի 21-ին, ժամը 11:20-ի սահմաններում, Աշտարակ-Եղվարդ ավտոճանապարհին՝ Նոր Երզնկա գյուղի կամարի հարևանությամբ, բախվել են «Jeep» և «Lada» մակնիշի ավտոմեքենաները, որի հետեւանքով 3 անձ հոսպիտալացվել է Աշտարակի ԲԿ։

«Փաստինֆո»-ի հետ զրույցում ԲԿ-ից հայտնեցին, որ առավել շատ տուժած տղամարդուն տեղափոխել են Երեւան, իսկ մյուս երկուսը գտնվում են Աշտարակում։

Ֆոտոլրագրող Շամշյանը հայտնել էր, որ բախման հետևանքով «Lada»-ն վերածվել է մետաղե ջարդոնի, «Jeep»-ն էլ դուրս է եկել երթևեկելի գոտուց , նա նաև հայտնել էր, որ իրավիճակը դեպքի վայրում բավականին լարված է, մեծ թվով գյուղացիներ ի նշան բողոքի փակել են ճանապարհը և պահանջում են, որպեսզի պատասխանատուները վերջապես հարցին լուծում տան. այս հատվածում 40-ից ավելի ճանապարհատրանսպորտային պատահար է տեղի ունեցել, այդ թվում՝ ողբերգական, ու ամեն անգամ պատասխանատուները, տվյալ դեպքում՝ Տարածքային կառավարման և ենթակառուցվածքների նախարարության «Ճանապարհային դեպարտամենտ» հիմնադրամի պաշտոնյաները այցելում են ու խոստանում, որ միջոցներ կձեռնարկեն, այդ թվում՝ նշված հատվածում կտեղադրվի արագաչափ, ինչը զսպաշապիկ կլինի որոշ վարորդների համար, սակայն այդ խոստումները օդ են դուրս գալիս ու հիմա բնակիչները պահանջում են, որ այդ հարցը կարճ ժամանակում լուծեն։Պարեկների ու ոստիկանների հետ զրույցից հետո բնակիչները ճանապարհը բացել են :