Իլհամ Ալիևի նպատակը Հայաստանի որպես պետության չեզոքացումն է

Լրագրող Ոսկան Սարգսյանը ֆեյսբուքյան իր էջում գրել է․

Ադրբեջանի նախագահ Իլհամ Ալիևը։ VGTRK-ին և RIA Novosti-ին տված հարցազրույցում ասել է ․ «Եվս երկու կետ, որ հայկական կողմը պետք է անի. առաջինը՝ փոխել իր սահմանադրությունը, քանի որ սահմանադրության մեջ հիշատակվում է անկախության հռչակագիրը, որն իր հերթին տարածքային պահանջներ է պարունակում Ադրբեջանի դեմ, որտեղ Լեռնային Ղարաբաղը հայտարարված է Հայաստանի մաս։ Ուստի, սահմանադրության փոփոխությունը մեր քմահաճույքը չէ։ Դրանք ուղղակի օբյեկտիվ պայմաններ են»,-
Բաքվի երկրորդ պայմանը, ըստ Ալիևի, ԵԱՀԿ Մինսկի խմբի լուծարումն է։
Իլհամ Ալիևին Հայաստանի հետ արդար, կայուն, հարատև խաղաղություն պետք չէ, նրան պետք է Նիկոլ Փաշինյանի իշխանությունը, որպեսզի անընդհատ Հայաստանից զիջումներ, տարածքներ պոկի, որպեսզի աղքատության, անիրավության մեջ գոյատևող Ադրբեջանի բնակչությանը ինքը շարունակ ներկայանա որպես հաղթող ղեկավար, այդ կերպ Ադրբեջանի բնակչության ուշադրությունը շեղի սոցիալական հիմնահարցերից։ Ադրբեջանը չի հաղթել Արցախում, Ալիևը այդ հաղթանակը միլիարդավոր դոլարներով գնել է։ Այդ պատճառով նա պատանդ է պահում Արցախի ղեկավարներն, որպեսզի նրանք ազատության մեջ հայտնվելով՝ չպատմեն Արցախի վերաբերյալ գործարքի մասին։ Ալիևը վախենում է այն Հայաստանից, որ Նիկոլ Փաշինյանից հետո է լինելու։ Նա ցանկանում է մեկընդմիշտ չեզոքացնել Հայաստանը՝ որպես պետություն, քանզի մահացու վախենում է ռևանշից։ Եթե Ադրբեջանի ու Հայաստանի միջև ինչ-որ թուղթ ստորագրվի՝ խաղաղության պայմանագիր անվամբ, այն չի գործելու, քանզի պայմանագրի 17 կետերն ունենալու են բազում ենթակետեր, որոնք վեճերի առիթ են դառնալու։ Եթե Հայաստանի ու Ադրբեջանի միջև հեղինակավոր միջնորդ կազմակերպություն կամ երկիր չկա, ո՞վ է հետևելու, որ պայմանագիրն իրականացվի։ Կարող ենք ունենալ նոր գործարք Իլհամ Ալիևի ու Նիկոլ Փաշինյանի միջև՝ Դուշանբեի վերելակի նման թաքուն պայմանավորվածություն՝ Հայաստանի համար աղետալի հետևանքներով։