Սինանյանի գրասենյակը լռում է. Ի վերջո սիրիահայերի առաջին խումբը երբ կտեղափոխվի Հայաստան
Դամասկոսի միջազգային օդանավակայանն առայժմ չվերթներ չի սպասարկի եւ Սիրիայից հայերը Երեւան գալ կարող են՝ օգտվելով Լիբանանից իրականացվող թռիչքներից։
«Զվարթնոց» օդանավակայանի մամլո խոսնակ Լուսինե Մողրովյանը «Փաստինֆո»-ին հայտնեց, որ Բեյրութ-Երեւան չվերթներն իրականացվում են կանոնավոր, 7- օրյա պարբերականությամբ, այս գիշեր եւս չվերթ է իրականացվել։
Օդանավակայանից դժվարացան ասել, թե Սիրիայից երբ կսկսեն չվերթներ ընդունել։
Սիրիայի խորհրդարանում հայազգի պատգամավոր Մարիա Գաբրիելյանն ավելի վաղ «Փաստինֆո»-ին հայտնել էր, որ Հալեպի օդանավակայանի տնօրինությունը խոստացել է առաջիկայում վերականգնել աշխատանքները, սակայն հստակ ժամկետներ դեռեւս չկան։ Փոխարենն արդեն բաց են ճանապարհները եւ ցամաքային ուղիներով մեր հայրենակիցները կարող են գնալ Լիբանան։
Հիշեցնենք, որ Սփյուռքի գործերի գլխավոր հանձնակատարի գրասենյակից հայտարարել էին, որ հալեպահայերի առաջին խմբի ժամանումը նախատեսված է դեկտեմբերի 14-ին, բայց մինչ այդ արդեն Բաշար Ասադի կառավարությունը Սիրիայում տապալվեց եւ օդանավակայաններն այլեւս չէին գործում։
Արդեն մի քանի օր «Փաստինֆո»-ն փորձում է մեկնաբանություն ստանալ հանձնակատար Զարեհ Սինանյանի գրասենյակից, թե, ի վերջո, ցանկություն ունեցող սիրիահայերի տեղափոխում իրականացվելու է, թե ոչ, եթե այո, ապա երբ, սակայն այստեղ զանգերին չեն պատասխանում։ Ավելին, անգամ հյուպատոսը դեռ չի վերադարձել Հալեպ։ Համենայն դեպս, ՀՀ ԱԳՆ-ն առայժմ հայտնել է միայն դեսպանատան աշխատակիցների Դամասկոս վերադառնալու մասին։
Մինչ հայ պաշտոնյաները խուսափում են կատարել իրենց պարտականությունները, նաեւ իրազեկել, թե մեր հայրենակիցներին օգնելու ուղղությամբ ինչ քայլեր են արվում՝ Հալեպում կյանքը-կամայց վերականգնվում է։ «Գանձասար» պարբերականի խմբագիր Զարմիկ Պողիկյանը «Փաստինֆո»-ի հետ զրույցում նշել էր, որ ուսումնամշակութային հաստատությունները վերսկսել են աշխատանքը, դժվարությամբ, բայց կամաց-կամաց վերադառնում են բնականոն կյանքի։ Լուրջ խնդիր է շարունակում մնալ ջրի ու էլեկտրաէներգիայի սակավությունը, ինտերնետի խափանումները։ Առկա է նաեւ գնաճ ու այդ կենցաղային հարցերի պատճառով հնարավոր է, որ մանկահասակ երեխաներ ունեցողները որոշեն մեկնել։ Զ. Պողիկյանի խոսքերով՝ «հեշտ որոշում չէ սեփական տունն ու գործը թողնել ու հեռանալ՝ դեպի մեկ այլ անորոշություն»։
Նշենք, որ Հալեպի ջրագիծը վնասվել էր ռազմական գործողությունների ժամանակ,ինչը դեռ չի վերականգնվել եւ Հալեպը, կարելի է ասել, գրեթե ջուր չունի։
Հետևեք մեզ Viber-ում
