«Մենք խայտառակ ենք եղել». Էդմոն Մարուքյան

ԱԺ «Ելք» խմբակցության պատգամավոր Էդմոն Մարուքյանն այն կարծիքին է, որ չորս տարի կորցրեցինք, այն ժամանակ կարող էինք մի մասը ստորագրել ու չորս տարի սպասել: Այնինչ, այս չորս տարիներին մենք հետընթաց ապրեցինք: Նման հայտարարությամբ հանդես եկավ պատգամավորը՝ անդրադառնալով ՀՀ–ԵՄ համաձայնագրի ստորագրմանը: Նրա խոսքով՝ 2013թ. Հայաստանն այնպիսի քայլ արեց, որին ոչ ոք չէր սպասում. «Մենք խայտառակ ենք եղել այդ ժամանակ։ ՀՀ-ում ազատությունների առումով ռեգրես է եղել 2013թ. հետո, և 2017թ. խորհրդարանական ընտրությունները որակապես այլ կլինեին, եթե այն ժամանակ Հայաստանը ստորագրած լիներ ասոցացման համաձայնագիրը։ Հայաստանը կոռուպցիայի դեմ պայքարում խայտառակ վիճակում է, ոստիկանական բռնությունների և դրանց բացահայտումների հետ կապված խայտառակ վիճակում է գտնվում, տնտեսության ազատականացման հետ կապված ևս խայտառակ վիճակ է»։ ԱԺ «Հայաստանի Հանրապետական կուսակցություն»  խմբակցության պատգամավոր, արտաքին հարաբերությունների հանձնաժողովի նախագահ Արմեն Աշոտյանն էլ ասաց, որ Հայաստան-ԵՄ համաձայնագրի որոշ կարևոր դրույթներ կսկսեն աշխատել անմիջապես ստորագրումից հետո։ «Համաձայնագրի որոշ կարևոր դրույթներ կսկսեն աշխատել անմիջապես ստորագրումից հետո: Խոսքը, հատկապես, այն դրույթների մասին է, որոնք բխում են գործընկերության գերակայություններից, որոնք ենթադրում են ֆինանսական աջակցություն` բյուջետային, ծրագրային աջակցության տեսքով և կարող են իրականացվել մինչև համաձայնագրի լիարժեք գործարկումը»,- ասաց Արմեն Աշոտյանը: