Արցախում պաշտոնյաների որդիները ծառայում են, պատերազմին էլ դիրքերում պատահական հանդիպել եմ Արցախի նախագահի որդուն. Վ. Բադասյան
Արցախի Հանրապետությունում պաշտոնյաների որդիների չծառայելու մասին խոսք չկա: Արցախում ծառայել է անգամ նախագահի որդին: Այս մասին Tert.am-ի հետ զրույցում ասաց Արցախի խորհրդարանի նախկին պատգամավոր, ընդդիմադիր գործիչ Վահան Բադասյանը՝ անդրադառնալով այն թեմային, որ «Զինվորական ծառայության և զինծառայողի կարգավիճակի մասին» նախագծի քննարկման ժամանակ օրակարգային հարց է դարձել նաև պաշտոնյաների որդիների՝ բանակում չծառայելու թեման: «Օրինակ` ես տեղյակ չեմ, որ ինչ-որ պաշտոնյայի երեխա Պաշտպանության բանակում չծառայի: Եթե անգամ ծառայում են «փափուկ» տեղերում, ապա միևնույն է՝ այդ «փափուկ» տեղերում էլ ինչ-որ մեկը պետք է ծառայի: Այսինքն՝ ես դա նորմալ եմ դիտարկում: Համեմատած Հայաստանի հետ դա նորմալ է»,-ասաց Բադասյանը: Վահան Բադասյանն ասաց, որ Արցախում ծառայել է նաև նախագահ Բակո Սահակյանի որդին, ինչի մասին, սակայն ոչ ոք չի իմացել: «Ապրիլյան պատերազմի ժամանակ, երբ դիրքերում էինք, այնտեղ պատահական տեսա մի տղայի, ում չէի ճանաչում: Հետո պարզվեց, որ նա Արցախի Հանրապետության նախագահ Բակո Սահակյանի որդին էր: Ծառայում էր Հադրութի զորամասում, և ոչ ոք չգիտեր, որ նախագահի որդին ծառայում է: Ես ինքն էլ չգիտեի, որ ծառայում է և դրա մասին իմացա պատերազմի ժամանակ: Այստեղ արդեն հետևություն՝ եթե նախագահի որդին ծառայում է, կարծում եմ՝ մյուսները չեն կարող իրենց որդիներին թաքցնել»: Բադասյանի խոսքով՝ պաշտոնյաների որդիների չծառայելու հարցն Արցախում չի կարող օրակարգային հարց լինել:
Հետևեք մեզ Viber-ում
