«Թոխմախի Մհերի» որդուն պատկանող տարածքը, ստեղծագործական և մարզական ՀԿ-ների տարածքները՝ կռվախնձոր․ երկու տարում դատախազությունն 82 հայց է ներկայացրել՝ ընդդեմ Կադաստրի կոմիտեի

Վերջին երկու տարում՝ 2023- 2024թթ ընթացքում ՀՀ գլխավոր դատախազությունը 82 հայց է ներկայացրել Վարչական դատարան՝ ընդդեմ Կադաստրի կոմիտեի՝ պահանջելով անվավեր ճանաչել մի շարք կառույցների, հողատարածքների գրանցումը։

2023թ․ ներկայացված հայցերից մեկը վերաբերում է «Թոխմախի Մհեր» մականունով հայտնի նախկին ԱԺ պատգամավոր Մհեր Սեդրակյանի որդուն՝ Դավիթ Մհերի Սեդրակյանին։ Մասնավորապես, դատախազությունը պահանջում է անվավեր ճանաչել 4 գույքի նկատմամբ «Դավիթ-Արտակ» ՍՊԸ-ի, Դավիթ Սեդրակյանի, ինչպես նաեւ Վարդան Սեդրակյանի սեփականության իրավունքը փաստող պետական գրանցումները։

Վարչական դատարանը 2024թ․ հուլիսի 4-ի որոշմամբ գործի վարույթը կարճել էր, դատախազությունը բողոքարկել է կարճման որոշումը, այժմ՝ գործը Վերաքննիչ վարչական դատարանի վարույթում է։

2023թ․ ներկայացված մեկ այլ հայցով դատախազությունը պահանջել է անվավեր ճանաչել Մանվել Գրիգորյանի սեփականության իրավունքը՝ Էջմիածին քաղաքի Նար-Դոսի փողոցի թիվ 3/1 հասցեի 813 քմ հողամասի նկատմամբ։
Նույն թվականին դատախազությունը հայց է ներկայացրել նաև «Ազգային օլիմպիական կոմիտե» իրավաբանական անձանց միության անվամբ 842.746 հա մակերեսով հաղամասի նկատմամբ սեփականության իրավունքի պետական գրանցումը և գրանցամատյանի գրառումները վերացնելու պահանջով։ Այս հայցը դեռրևս քննության փուլում է, գտնվում է դատավոր Կարեն Զարիկյանի վարույթում։

Համանման հայցեր ներկայացվել են նաև 2024թ․ -ին։ Ըստ այդմ՝ դատախազությունը պահանջել է վերացնել Երևան քաղաքի Ագաթանգեղոսի 6 հասցեում գտնվող 1,980 հա մակերեսով հողամասի և 16053 քմ մակերեսով «Սպարտակ» մարզական հալալիրի նկատմամբ 15.12.1999թ. ՀՀ ԳԱ անշարժ գույքի պետական միասնական կադաստրի վարչությունում «Հայաստան» մարզական միություն» հասարակարան կազմակերպության սեփականության իրավունքի պետական գրանցումը և տրամադրված 0272007 սեփականության վկայականը և դրա հետևանքները, այն է՝ 12.08.2021թ. Հայաստան» մարզական միություն» հասարակարան կազմակերպության սեփականության «ԷՎՈԿԱԲԱՆԿ» ՓԲԸ-ի միջև կնքված անշարժ գույքի գրավի պայմանագիրը, դրա հիման վրա 13.08.2021թ. «ԷՎՈԿԱԲԱՆԿ» ՓԲԸ-ի գրավի իրավունքի պետական գրանցումը և տրամադրված թիվ 13082021-01-0193 վկայականը, 04.09.2023թ. Հայաստան» մարզական միություն» հասարակարան կազմակերպության և «ԷԿՈ ՊԵՏՐՈԼ» ՍՊԸ-ի միջև կնքված անշարժ գույքեի տարաժամկետ վճարման պայմանով առուվաճառքի պայամանագիրը, դրա հիման վրա «ԷԿՈ ՊԵՏՐՈԼ» ՍՊԸ-ի սեփականության իրավուքը 06.09.2023թ. պետական գրանցումը և տրամադրված թիվ 06.09.2023-01-0019 վկայականները։ Հայցը վերադարձվել է, իսկ դատախազությունը բողոքարկել սույն որոշումը։

Մեկ այլ հայց էլ կապված է «Հայաստան» մարզական միություն» ՀԿ-ի հետ, այս հայցով էլ դատախազությունը պահաջում է չեղարկել Երևան քաղաքի Ցախի 6 հասցեում գտնվող 1614.1 քմ մակերեսով մարզական համալիրի նկատմամբ 29.12.1999թ. ՀՀ ԿԱ անշարժ գույքի պետական միասնական կադաստրի վարչությունում «Հայաստան» մարզական միություն» հասարակարան կազմակերպության սեփականության իրավունքի պետական գրանցումը և տրամադրված 0231261 սեփականության վկայականը և դրա հետևանքները վերացնել։

Այս հայցը դատարանը ևս վերադարձրել է, իսկ հայցը վերադարձնելու որոշումը՝ մնացել անփոփոխ։

Նախկինում հայտնել ենք, որ դատախազությունը հայցեր է ներկայացրել նաև «Նկարիչների միության» և «Գրողների միության» շենքերի վերաբերյալ։ Մասնավորապես, «Գրողների միության» վերաբերյալ դատախազությունը երկու հայց է ներկայացրել, մեկը՝ «ՀՀ գրողների միության» Սևան ստեղծագործական կազմակերպության սեփականության իրավունքի պետական գրանցումն անվավեր ճանաչելու պահանջով, մյուսը՝ «ՀՀ գրողների միության» ՀԿ 2001 թվականի օգոստոսի 9-ի սեփականության իրավունքի պետական գրանցումն անվավեր ճանաչելու և որպես հետևանք՝ 2013 թվականի հունիսի 3-ի իրավունքի պետական գրանցումը վերացնելու պահանջով։ Երկու հայցերն էլ վարույթ են ընդունվել, քննության փուլում են։ Հայց է ներկայացվել նաև Գրողների միությանը պատկանող Ծաղկաձոր քաղաքի ստեղծագործական տան 7303,40քմ շինության նկատմամբ և 2,7 հա հողի օգտագործման իրավունքի վերաբերյալ թիվ 001210 պետական գրանցումը և հետևանքներն անվավեր ճանաչելու պահանջով։ Այս հայցը ևս վարույթ է ընդունվել, հայցի ապահովման միջոց կիրառելու միջնորդությունը՝ մերժվել։ Համանման հայցեր ներկայացվել է նաև «Նկարիչների միության» վերաբերյալ։

Բոլորովին վերջերս դատախազությունն ընդդեմ Կադաստրի կոմիտեի հայց է ներկայացրել նաև՝ «Կինոթատրոն Մոսկվա» ՍՊԸ-ի անվամբ 02.04.2003թ. անշարժ գույքի սեփականության իրավունքի գրանցումը մասնակիորեն, այն է՝ «Կինոթատրոն Մոսկվա» ՍՊԸ-ի անվամբ ք. Երևան, Կենտրոն համայնք Աբովյան փողոց թիվ 18 շենք հասցեում 3759,4 քմ մակերեսով հողամասի նկատմամբ գրանցված սեփականության իրավունքը 994,6 քմ հողաբաժնի չափով, և հետևանքներն անվավեր ճանաչելու պահանջով։ Այս հայցը ևս քննության փուլում է։

Հեղինակ՝ Իզաբել Սահակյան

Աղբյուր` Փաստինֆո