Թրքամետ խմբավորումները Հալեպից արևմուտք լայնածավալ հարձակում են սկսել Սիրիայի դիրքերի վրա

Սիրիայի հյուսիսում ընդդիմության վերջին անկլավում գտնվող ապստամբները, որոնց աջակցում է Թուրքիան, լայնածավալ ռազմական գործողություններ են սկսել սիրիական բանակի դեմ և տարածքներ գրավել։

Ապստամբների հարձակումն ընդգրկում է Սիրիայի նախագահ Բաշար Ասադի վերահսկողության տակ գտնվող առնվազն 10 շրջան Հալեպ նահանգի հյուսիս-արևմուտքում։ Al Jazeera-ն գրում է, որ սիրիական բանակի տասնյակ զինվորներ և ապստամբ զինյալներ են սպանվել հյուսիսային Հալեպ նահանգում, որտեղ Հայեթ Թահրիր ալ-Շամ (HTS) զինված խմբավորումը և դաշնակից ուժերը գրավել են Սիրիայի նախագահ Բաշար Ասադի զինվորականների վերահսկողության տակ գտնվող առնվազն 10 շրջաններ:

«Նոյեմբերի 27-ին՝ ժամը 7:50-ից, «Ջաբհաթ ան-Նուսրա» ահաբեկչական կազմակերպության հետ կապված անօրինական զինված խմբավորումները հարձակվել են Սիրիայի կառավարության կողմից վերահսկվող տարածքների վրա՝ Հալեպ և Իդլիբ նահանգներում: Սիրիական արաբական բանակը համառորեն կռվում է ռուսական օդատիեզերական ուժերի աջակցությամբ: Սիրիական արաբական բանակը, Ռուսաստանի օդատիեզերական ուժերի աջակցությամբ, ոչնչացրել է առնվազն 400 գրոհայինի, որոնք հարձակվել էին Հալեպի և Իդլիբի նահանգների վրա»,- այս մասին ճեպազրույցի ժամանակ հայտնել է Սիրիայում պատերազմող կողմերի հաշտեցման ռուսական կենտրոնի ղեկավարի տեղակալ, կապիտան Օլեգ Իգնասյուկը: