ՀՀ–ի արևմտամետ քաղաքականությունը կորուստի է տանում. փորձագետը՝ ՌԴ ԱՀԾ հայտարարության մասին

Ռուսաստանի արտաքին հետախուզության ծառայության` Հայաստանում ընտրություններից առաջ արևմտամետ կուսակցություններին առաջ մղելու մասին հայտարարությունը միանգամից երկու ուղերձ է պարունակում։ Sputnik–ի հետ զրույցում այս տեսակետն է հայտնել Մոսկվայի միջազգային հարաբերությունների պետական ինստիտուտի առաջատար գիտաշխատող Նիկոլայ Սիլաևը։

Նախ` մինչ օրս երբեք այսքան բարձր մակարդակով անուն առ անուն չեն թվարկվել Հայաստանի քաղաքական կուսակցությունների այն առաջնորդները, որոնք համարվում են ամերիկամետ։

Երկրորդ՝ Մոսկվայից երբեք այդքան հստակ չի հնչել, որ Հայաստանի արևմտամետ քաղաքականությունը տանում է ապագա տնտեսական կորուստների։

Վերլուծաբանի կարծիքով՝ տվյալ դեպքում գործ ունենք ոչ թե հետախուզական կառույցի մասնագիտական բնույթի հաղորդման, այլ ավելի շուտ դիվանագիտական հայտարարության հետ։

«Փաստաթղթերը, որոնք հեղինակում է ԱՀԾ-ն, կարող են տարբեր կարգավիճակ ունենալ։ Եթե դրանք դրված են երկրի նախագահի սեղանին, ուրեմն արտաքին հետախուզության ծառայության զեկույց է։ Իսկ եթե մամուլի բյուրոյի կողմից հրապարակվում են կայքում, ապա դա ոչ այնքան ԱՀԾ-ի զեկույց է, այլ ավելի շատ դիվանագիտական հայտարարություն։ Նման հրապարակման իմաստը հանրությանն ինչ–որ փաստերի ծանոթացնելը չէ, այլ գնահատական տալը և քաղաքական դիրքորոշում արձանագրելը»,-ընդգծել է նա։

Ավելի վաղ Ռուսաստանի ԱՀԾ –ն հաղորդագրություն էր տարածել, որում ասվում էր` արևմտամետ կուսակցությունների առաջ խնդիր է դրված Հայաստանի գործադիր իշխանության «ձեռքերին հարվածելու», եթե նա, հետևելով հարևան Վրաստանի կառավարության օրինակին, որոշի առաջնահերթություն տալ ազգային օբյեկտիվ շահերին, հայ ժողովրդի ավանդույթներին և արժեքներին։