Եթե կինդ «Նիկոլին ներելը» չի հասկանում, մենք ո՞նց հասկանանք․․․

Գեղամ Նազարյանի մասին դեռ շատ կգրվի, կխոսվի, բայց ես ուզում եմ   ներկայացնել նրա հետ իմ զրույցը՝ «Ես ներել եմ Նիկոլին» հարցի շրջանակներում։ Այդ հարցի շուրջ ֆեյսբուքյան գրառմամբ  2024 թվականի օգոստոսի 30-ին իմ մի հոդվածի առթիվ հակադրվել էր ինձ հետ, ներկայացնում եմ առանց փոփոխման  մեր զրույցը, որն այսօրվա հայտարարությունից հետո արդիական դարձավ․ 
Aug 30, 2024, 9:40 PM
Gegham Nazaryan

Հարգարժան Հասմիկ, ներելը թե ինչ է եւ ուզում եք հասկանալ թե ինչ է, դիմեք այն հոգևորականին, որին վստահում եք։ 
Ուզում ներկայացնել նաև իմ պատասխանը․ 

-Ներելը չպիտի փոքրացնել, , երբ խոսքը վերաբերվում է հայրենիքին։ Մելիք ֆրանգյուլներին ներե՞ լ․․․ Տա Աստված, որ ժամանակավոր ընկճվածություն լինի մոտդ։ Հայրենիքը Սուրբ հոգին է, անհնարին է ներել Սուրբ հոգին սպանողին։ Ինչ վերաբերվում է հոգեվորականին դիմելուն, կդիմեմ, որ աղոթի ձեզ համար։ Ամենայն անկեղծությամբ ու սիրով եմ ասում։

Gegham Nazaryan
Ընդհակառակը մեծացնում ենք
Ցավում եմ բայց ինչպես դուք այնպես ես նախկինում, հիմա իմ կինը նաեւ ներելը չեք հասկանում ինչ ա։ Դուք ներելը շփոթում եք այլ բառերի հետ։
Մի ֆիլմ կա նայեք` Խրճիթ։ Գուցե հասկանաք։ Աղոթքի համար շնորհակալ եմ։ Բայց մի հարց` հայրենիքը ոնց են սիրում, հեռանալո՞վ ու հեռացնելո՞վ թե ճոռո ճոռո խոսքերով։ Ու դուք վստահ եք թե մեր օրերի հող ծախողներն ովքեր են։
Ինչ վերաբերում է ընճախտին, ապա այն ինձ մոտ պատերազմից հետո բացակայում է։

-Հոգուդ մեջ շատ բան կա, չխորանամ։ Անկեղծ չես ոչ թե մեր, այլ ինքներդ ձեր առաջ։ Ձեզ երկար չեք կարող խաբել։
Gegham Nazaryan
Ամբողջովին սխալվում եք։

Հենց նոր կարդում եմ Գեղամ Նազարյանի հայտարարությունից մի հատված, ուզում եմ ներկայացնել․ 

«Ճակատագրի հեգնանքն այն է, որ ինձ նիկոլական լինելու մեջ մեղադրում են նրանք, ովքեր 2018-ին ինձ աղաչում էին, որ միջնորդեմ, որ իրենց կառավարության մի անկյունում տեղավորեն, մեղադրում են նրանք, ովքեր հավանորեն իրենց տան մի մութ անկյունում պահում են «Դուխով» մակագրությամբ իրենց գլխարկները»:

Մեկնաբանություն չեմ անում։ Գեղամին, ում հարգում եմ որպես զոհվածի հայր և ոչ թե որպես պատգամավոր, հիշեցնում եմ իր գրածը՝ իմ կինը ներելը չի հասկանում։ Այսինքն՝ եթե կինդ «Նիկոլին ներելը» չի հասկանում, մենք ո՞նց հասկանանք․․․ Մենք մի Աբգար չենք կորցրել, հազարավոր Աբգարներ ենք կորցրել և կորցնողը խոստովանեց, որ կարող էինք նաև չկորցնել։ Մենք հազարավոր աբգարների ենք նստեցրել հաշմանդամության սայլակներին։  Մենք կորցրել ենք մեր աբգարների  հայրենիքը, որը նրանք իրենց կյանքով փորձում էին պահել․․․ Կորցրել ենք Արցախը, Հայաստանն ենք կորցնում։ Ո՞նց ներենք։ Ո՞ր մի հոգևորականը կփորձի ինձ ու Աբգարի մորը բացատրել, թե ինչպես ներենք։ Թող փորձի։ 

Հիշեցնենք, որ «Հայաստան» դաշինքի պատգամավոր Գեղամ Նազարյանի վարքը խմբակցությունը որոշել է քննարկման դնել, և չի բացառվում, որ նրանք  էլ Նազարյանին «խնդրեն» մանդատը վայր դնել՝ Հովիկ Աղազարյանի օրինակով։

Հասմիկ Բաբաջանյան

«Հրապարակ օրաթերթ»