Ավտոտնակում կայանված Lexus-ները հրկիզելու կասկածանքով բռնվել է Նոր Արեշի գարեջրատան տիրոջ որդին

Երեկ՝ նոյեմբերի 25-ին, ՀՀ ներքին գործերի նախարարության ոստիկանության համայնքային ոստիկանության գլխավոր վարչության Էրեբունու բաժնի ծառայողները՝ բաժնի պետ Դավիթ Պետրոսյանի, բաժնի պետի տեղակալ Վլադ Բազունցի գլխավորությամբ իրականացնելով հսկայածավալ օպերատիիվ-հետախուզական աշխատանքներ, պարզել են նոյեմբերի 24-ին Էրեբունի վարչական շրջանում Նոր Արեշ 44 փողոցի տներից մեկի 1-ին հարկում գտնվող ավտոտնակում կայանված «Lexus» մակնիշի ավտոմեքենաները հրկիզողի ինքնությունը:

Ինչպես հայտնում է ֆոտոլրագրող Գագիկ Շամշյանը, համայնքային ոստիկանները պարզել են, որ այն հրկիզել է Երևանի բնակիչ 28-ամյա Արսեն Գաբրիելյանը, ով նշված փողոցի բնակիչ է և Նոր Արեշում հայտնի գարեջրատան սեփականատեր «Սամիկոյի» տղան է:

Վերջինը տեղափոխել է ոստիկանության Էրեբունու բաժին, որտեղից նրան ներկայացրել են ՀՀ քննչական կոմիտեի Երևան քաղաքի քննչական վարչության Էրեբունի և Նուբարաշեն վարչական շրջանների քննչական բաժին:

Oragir.News-ի տեղեկություններով էլ՝ մոխրակույտի վերածված «Lexus»-ները պատկանում են Երևանի փոխքաղաքապետ Արմեն Փամբուխչյանին։

Մեզ հասած տեղեկություններով՝ ավտոմեքենաները Հայաստան են բերվել Արմեն Փամբուխչյանի վարորդի անունով։ Շրջանառվող տեղեկություններով էլ՝ հրդեհը պատահականություն չի եղել։

Հատկանշական է նաև, որ ավտոտնակը, որտեղ կայանված են եղել «Lexus»-ները, պատկանում է Արեշում հայտնի «Սամիկոյի» տղային, ով կասկածվում է այս տարվա հուլիսի 9-ին Երևանում՝ «Քաղաքացիական պայմանագիր» կուսակցության մոտ կրակոցներ արձակելու մեջ։