Քաղաքապետարանի աշխատակիցները բռնի ուժով իջեցրին ավտոբուսից. TelCell-ի ապարատը կտրոն չի տալիս, ես էլ 100 դրամանոց չունեի.Ահազանգ բնակչից

Երևանի բնակիչ Վահագն Մկրտչյանն ահազանգում է, որ այսօր իրեն բռնի ուժով իջեցրել են 16 համարի 5425 պետհամարանիշով ավտոբուսից՝ 100 դրամանոց չունենալու պատճառով։ «Փաստինֆոյի» հետ զրույցում նա հայտնեց, որ այն կանգառից, որտեղից ինչքը ավտոբուս է նստում, TelCell-ի ապարատը չի աշխատում ու հնարավորություն չի ունեցել տոմս վերցնել։

«Ես արդեն տևական ժամանակ է հաճախ երթևեկում եմ անվճար, քանի որ մոտս 100 դրամանոց չի եղել, իսկ TelCell-ի ապարատը վերցրել է գումարը ու կտրոն չի տրամադրել։ Բազմիցս զանգել եմ TelCell, կամ չեն պատասխանել զանգերին կամ էլ ամեն ինչի մասին խոսել են, բացի պատճառը ու գումարը վերադարձնելու տարբերակները ներկայացնելուց»։

Նա պատմեց, որ երբևէ նախկինում նման դեպք չի արձանագրել, որ բռնությամբ իրեն ավտոբուսից իջեցնեն։ «Այս անգամ 16 համարի ավտոբուսն էր, վարորդին ասացի, որ QR չունեմ, 100 դրամանոց նույնպես, կանգառի դիմացի ապարատն էլ արդեն 3-րդ օրն է՝ կտրոն չի տրամադրում։ Խոսքը Պարույր Սևակ-Ուլնեցի խաչմերուկում տեղադրված ապարատի մասին է։ Վարորդին ասաց, որ իր վրա է խոսակցություն գալիս, Ասացի՝ գումար ունեմ, պատրաստ եմ վճարել, 500 էլ ունեմ, 1000 էլ։

Կողքին 2 տղա էին նստած, վեր կացան, ասացին՝ քաղաքապետարանի տրանսպորտի վարչությունից են ու, թե բա՝ գումար չունեք՝ մի երթևեկեք։ Ասացի ունեմ, 500 դրամանոցը հանեցի՝ գցեցի ապարատը։ Ասացին՝ չի կարելի ու միանգամից թևերիցս բռնեցին ու բռնի ուժով ինձ հրեցին դուրս, ամեն ինչ այնքան արագ կատարվեց, որ չհասցրի հեռախոսս հանեմ ու նկարեմ, կամ էլ իրենց բացատրեմ, որ անօրինական բան են անում։ Զանգարահել եմ 1-02, հույս ունեմ, որ ավտոբուսում տեսահսկման ձայնագրությունը ջնջած չեն լինի ու շատ հեշտ կլլինի իրենց պատասխանատվության ենթարկել»։

Մկրտչյանն ընդգծեց, որ քաղաքապետարանի աշխատակիցների գործողություններն անօրինական են, «Ցանկացած քաղաքացու հանդեպ ուժ կիրառելը, Եթե դա ինքնապաշտպանություն չէ, հակաօրինական է։

Բայց ամենացավալին այն է, որ մի ավտոբուսի ժողովրդի համար այս իրավիճակը նորմալ է, նորմալ է, որ օրենք են խախտում ու քաղաքացու հանդեպ բռնի ուժ են կիրառում։

Մարդկանց համար նորմալ է նաև այն, որ հունվարի 1-ից տրանսպորտը 300 դրամ է դառնալու, ես ի վիճակի եմ իմ ընտանիքի համար տոմս գնել՝ երթևեկել, բայց Երևանում բացի ինձանից 1.5 մլն մարդ կա, որից 800 000-ը ի վիճակի չէ։ Չի կարելի ուղղակի նման եսասիրություն դրսևորել, ասել՝ ես կարող եմ, մնացածը՝ «ջհանդամ», էդպես հասարակություն չի լինում։ Ընդ որում ՝այդ 300 դրամը կարող էր նորմալ լինել, եթե ես առավոտյան 300 դրամ տամ՝ նստեմ ու նստած գնամ, երեկոյան էլ էլի նստած վերադառնամ տուն, բայց ոչինչ չի փոխվելու, իրականում, նույն կերպ՝ ինչ որ մեկի շալակին նստած եմ գնալու - գամ, իրենց ասած 171 նոր ավտոբուսի մասին տեղեկությունը պարզապես փուչիկ է»։

Մենք մենկաբանություն խնդրեցինք նաև Երևանի քաղաքապետարանից, արձագանք ստանալու դեպքում՝ կհրապարակենք նաև քաղաքապետարանի մեկնաբանությունը։