Կարող եմ նշել այլ դրվագներ, թե ինչպես են մեր խոշոր ակումբները դարձել խաղալիք ՀՖՖ այս ղեկավարության ձեռքին. Թաթուլ Հակոբյան

Լրագրող, հրապարակախոս, «Դովեղ» ֆուտբոլային ակումբի հիմնադիր Թաթուլ Հակոբյանը ֆեյսբուքյան իր էջում անդրադարձել է ՀՖՖ այսօրվա ղեկավարության շուրջ ստեղծված իրավիճակին։

Նա մասնավորապես գրել է. «Դիտեցի «Փյունիկ»-ի սեփականատեր Արթուր Սողոմոնյանի հարցազրույցը Համլետ Ղուշչյանի հետ և ուշադրությունս գրավեց հատկապես մեկ դրվագ:

Պարոն Սողոմոնյանը արձանագրում է, որ (մեջբերումը բառացի չէ) երբ ՀՖՖ այսօրվա ղեկավարությունը կռիվ է տվել այլ ակումբների դեմ, իրենք լռել են, ու հիմա հերթը հասել է իրենց: Նա ափսոսանքով է նկատում, որ այն ժամանակ պետք չէր լռել:

Անշուշտ, լռելու պահով դա ճշմարտություն է, բայց միայն հիսուն տոկոսով:

Ճշմարտութան մյուս հիսուն տոկոսն այն է, որ երբ ՀՖՖ ղեկավարությունը, ապօրինաբար, առանց հիմքերի քանդում էր, օրինակ, «Լոկոմոտիվ» ակումբը՝ նրան մեղադրելով պայմանավորված խաղերի մեջ (այս գործով ՀՖՖ-ն Լոզանի դատարանում պարտվել է «Լոկոմոտիվ»-ին և այդ ակումբին արդեն վճարել 50 հազար ֆրանկ), ակումբների մեծ մասը ոչ միայն լռում էր, այլև աջակցում ՀՖՖ ապօրինությանը:

Ես կարող եմ նշել այլ դրվագներ, թե ինչպես են մեր խոշոր ակումբները դարձել խաղալիք ՀՖՖ այս ղեկավարության ձեռքին:

Կամ երբ «Սևան» ակումբի նախագահ Տիգրան Հակոբյանն ապօրինաբար զրկվում էր հինգ տարով ֆուտբոլային գործունեություն ծավալելու իրավունքից (ՀՖՖ-ն այս գործով էլ է պարտվել Լոզանում՝ CAS-ում և վճարել 51 հազար ֆրանկ), քանի՞ խոշոր ակումբ ձայն հանեց:

Հենց ուղտը չոքում է ձեր դռանը, այն ժամանակ եք հիշում ու խոսում արդարությունից ու ապօրինություններից:

Խնդրեմ, նայեք նաև, թե, օրինակ, «Ուրարտու» ակումբը, որ նույնպես պահանջում է ՀՖՖ նախագահ Արմեն Մելիքբեկյանի հրաժարականը, ինչպես է իրեն դրսևորել ՀՖՖ քվեարկություններում, ժողովներում ու Գործկոմի նիստերում:

Հրապարակավ պարոն Մելիքբեկյանի հրաժարականը պահանջելուց առաջ կամ զուգահեռ, պետք է խիզախություն ունենալ և բարեկամաբար ներողամտություն հայցել այն քվերակությունների համար, որոնք արվել են ընդդեմ ակումբների և ի շահ ՀՖՖ այսօրվա ղեկավարության:

Եվ, ի դեպ, ովքեր չգիտեն, ասեմ՝ երբ Տիգրան Հակոբյանին ապօրինաբար հինգ տարով հեռացրեցին հայկական ֆուտբոլից, նա գնեց Վրաստանի «Թելավի» ակումբը, որը խաղում է այդ երկրի Բարձրագույն լիգայում: Իբր շատ հայ, հայաստանյան բիզնեսներ կային, որ հայկական ֆուտբոլում էին, մի հատ էլ նրանցից մեկին դուրս մղեցին»: