Ինչով է վտանգավոր Monsanto-ն. որոնք են խաղի կանոնները

Monsanto-ն հզորագույն ընկերություն է, որն ամեն տարի ահռելի մեծ քանակությամբ ֆինանսական ռեսուրսներ է ծախսում՝ լոբբիստական աշխատանքների համար: Այսօր լրագրողներին ասաց ՀՀ ԳԱԱ Էկոկենտրոնի սննդի շղթայի ռիսկերի գնահատման կենտրոնի ղեկավար, Պարենային իրավունքի փորձագետ Դավիթ Պիպոյանը՝ հավաստիացնելով նաև, որ նման ընկերությունները յուրաքանչյուր երկրում խաղում են այդ երկրի կանոններով: «Այնպես չէ, որ Monsanto ընկերությունը հետաքրքրված է բացառապես ՀՀ շուկայով։ Monsanto ընկերությանը չի կարելի մեղադրել: Այս և բոլոր այն ընկերությունները, որոնք կարող են մուտք գործել այլ երկիր, պետք է խաղան տվյալ երկրի խաղի կանոններով։ Եթե ՀՀ-ն չի սահմանել խաղի կանոններ և չի արգելում գենետիկորեն մոդիֆիկացված գյուղատնտեսությունը, ապա ոչ միայն Monsanto-ն, այլև կամայական այլ տրանսգենային սերմեր արտադրող կազմակերպություն, առանց որևէ խոչընդոտի, կարող է մուտք գործել ՀՀ: Միջազգային կազմակերպությունը որևէ մեղք չունի, որ ՀՀ-ն ունի անկատար օրենսդրություն, չունի ԳՄՕ ռիսկերի գնահատման համապատասխան կենտրոն, կամ առնվազն կառավարական հանձնաժողով»,- նշեց նա: Դավիթ Պիպոյանը նշեց նաև, որ այն հայտնի է ոչ միայն ԳՄՕ-ներով, այլև ընկերության հետ պայմանավորված են մի շարք թույներ, որոնք և՛ շրջակա միջավայրի թույներ են, և՛ մարդու առողջության։ «Այս ընկերությունը ներգրավված է եղել պոլիքլորացված բիֆենիլների արտադրության ոլորտում, որն այսօր համարվում է արգելված տարր, որովհետև պահպանվում է շրջակա միջավայրում և մարդու օրգանիզմում։ Այս ընկերության անունը պայմանավորված է հորմոնային աճի խթանիչների արտադրության հետ, որի հետ կապված բազմաթիվ խնդիրներ են առաջանում։ Ընկերության գործունեությունը կապվում է նաև միջուկային զենքի և ատոմային ռումբի արտադրության հետ»,- հայտարարեց բանախոսը: