Ովքե՞ր առաջիկայում կլքեն ՆԳՆ-ն

Վահե Ղազարյանի ազատումից հետո համակարգն «ինքնակամ» կլքեն նաեւ մի քանի խոշոր ու մանր պաշտոնյաներ:
Համակարգում շրջանառվող տեղեկության համաձայն՝ ոստիկանությանը հրաժեշտ կտա Ղազարյանի, այսպես ասած, աջ ձեռք ու ականջ համարվող Վարդան Վարդանյանը, ինչպես նաեւ Կարեն Հակոբյանը։ Երկուսն էլ ոստիկանապետի տեղակալներ էին նշանակվել ՆԳՆ-ի ձեւավորումից հետո։

Ճամպրուկային է նաև ՆԳ նախարարի օգնական Ժորա Նիկողոսյանը։ Տեղեկություններ կան, որ հենց Վահե Ղազարյանը չի ցանկանում, որ Նիկողոսյանը մնա համակարգում, քանի որ իր վերաբերյալ ահռելի ինֆորմացիայի է տիրապետում: Թեեւ նրա ինֆորմացիոն բազան միայն նախարարի վերաբերյալ չէ ու բացառված չէ, որ հենց դրա շնորհիվ կարողանա համակարգում պահպանել իր պաշտոնը։

Հնարավոր հեռացողների թվում նշվում է նաեւ կիբերհանցագործությունների դեմ պայքարի ստորաբաժանման ղեկավարի անունը, որը Վահե Ղազարյանի վաղեմի ընկերն է:

Ավելին, համակարգում չեն բացառում, որ գուցեեւ չեղարկվեն Վ. Ղազարյանի կողմից վերջին օրերին կատարված նշանակումները։

Հնարավոր ազատումների մասին տեղեկությունների վերաբերյալ «Փաստինֆո»-ն մեկնաբանության համար դիմել է ՆԳՆ մամլո խոսնակին, որը վստահեցրեց, որ այս պահի դրությամբ որեւէ նոր դիմում չկա՝ աշխատանքից ազատվելու մասին։ Ըստ ամենայնի՝ ալիքը կսկսվի ՆԳ նոր նախարարի նշանակումից հետո։

Աղբյուր` Փաստինֆո