Հայաստանում ոստիկանները հեծանիվ քշել գիտե՞ն. փոխոստիկանապետը՝ Տոյոտայի ճոխ գնումների մասին

«Հայկական ժամանակը» գրում է, որ ՀՀ ոստիկանությունը 2017 թվականին «Տոյոտա-Երեւան» ընկերությանից ձեռք է բերել 43 հատ 2017 թվականի արտադրության Toyota Corolla մակնիշի մեքենա: Ոստիկանությունը «Տոյոտա-Երեւան» ընկերությանն այս 43 մեքենայի համար վճարել է 350 մլն ՀՀ դրամ: ԱԺ-ում «ՀԺ»-ի լրագրողը փոխոստիկանապետ Վարդան Եղիազարյանից հետաքրքրվել է, թե ինչո՞ւ է ոստիկանությունն այդքան մեքենա ձեռք բերել: «Ծառայողական անհրաժեշտության համար՝ հիմնականում ճանապարհային ոստիկանության համար: Թարմացնում ենք մեր տրանսպորտը»,- մեր թղթակցի հետ զրույցում ասել է Եղիազարյանը: Ինչպե՞ս է ստացվում, որ վերջին տարիներին ոստիկանությունը մեքենաներ է ձեռք բերում Ռոբերտ Քոչարյանի անվան հետ կապվող «Տոյոտա-Երեւան» ընկերությանից, իսկ բացի այդ նույն ընկերությունը կրկին վերջին տարիներից սկսած սպասարկում է այդ մեքենաներին՝ տեխնիկական խնդիրների դեպքում: Հարցին փոխոստիկանապետը պատասխանել է. «Տոյոտան ամենալավ մեքենան է, ուստի մենք էդ բանի հետ ենք համագործակցում: Ես ինչքան գիտեմ՝ էտի ամենալավն է, իսկ թե ում է պատկանում, տեղյակ չեմ»: Թղթակցի դիտարկմանը, թե ԱՄՆ-ի որոշ նահանգներում ոստիկանները ծառայությունն իրականացնում են հեծանիվներով, Եղիազարյանն ընդհատել է լրագրողի խսքը եւ ասել, որ որոշ երկրներում էլ ձիերով են ծառայություն իրականացնում: Հարցին, թե Հայաստանի ոստիկանները հեծանիվ վարել չգիտե՞ն, փոխոստիկանապետն ասել է. «Չեմ կարող ասել՝ հնարավո՞ր է հեծանիվով ծառայություն իրականացնել, թե՝ ոչ: Դրան դեռ պատրաստ չենք»,- նշել է նա: