Վիգեն Սարգսյանը հանդիպել է ուսանողների հետ.ինչ է խոստացել նա
Նոյեմբերի 7-ին ՀՀ ՊՆ վարչական համալիրում կայացել է ՀՀ պաշտպանության նախարար Վիգեն Սարգսյանի հանդիպումը ուսանողական, երիտասարդական, հասարակական կառույցների ներկայացուցիչների հետ։ Այս մասին հայտնում են ՀՀ Պն-ից: Հանդիպման ընթացքում ՀՀ պաշտպանական գերատեսչության ղեկավարը ներկայացրել է «Պաշտպանության մասին» եւ «Զինվորական ծառայության եւ զինծառայողի կարգավիճակի մասին» օրենսդրական նոր նախագծերի շրջանակում նախատեսվող փոփոխությունները, մասնավորապես՝ անդրադարձել է զինվորական ծառայության եւ ուսումնական տարկետման շաղկապման հարցերին, «Ես եմ» եւ «Պատիվ ունեմ» ծրագրերով նախատեսվող այլընտրանքային ծառայության դրույթներին եւ առանձնահատկություններին: ՀՀ պաշտպանության նախարար Վիգեն Սարգսյանը շեշտել է, որ թեեւ որոշ կառույցներ եւ ուժեր փորձում են նենգափոխել ու այլ հարթության մեջ ներկայացնել մեր երկրի պաշտպանության ու անվտանգության համար չափազանց կարեւոր օրենսդրական նոր նախաձեռնությունների գաղափարն ու բովանդակությունը, իրականում փոփոխությունների հիմնական նպատակը զինվորական ծառայությանն ու կրթությանը նոր որակ հաղորդելն է։ Վիգեն Սարգսյանը եւս մեկ անգամ ընդգծել է, որ բուհական տարկետումների ներկայիս համակարգը թերի է եւ ծնում է անարդարության բազմաթիվ դրսեւորումներ, իսկ նոր օրենքներով առաջին անգամ հավասարության նշան է դրվում պետական եւ մասնավոր բուհերում սովորող ուսանողների միջեւ՝ նրանց առաջարկելով ֆինանսական շոշափելի փոխհատուցման փաթեթով այլընտրանքային զինվորական ծառայության տարբերակներ՝ չստեղծելով որեւէ խոչընդոտ բացառիկ կարողություններ ունեցող ուսանողների եւ գիտությամբ զբաղվել ցանկացող երիտասարդների համար։ Պաշտպանության նախարարը նկատել է, որ ուսանողների այն մտահոգությունները, թե իբր նոր օրենքներով տարկետում հասկացությունը վերանալու է, բնավ իրականությանը չի համապատասխանում։ Ուսումնական տարկետումը չի վերացվում, այլ կրթություն ստանալ ցանկացող, դրա անընդհատությունը կարեւորող քաղաքացիներին, ովքեր ուսումն ավարտելուց հետո պետք է բակալավրի աստիճանով զորակոչվեն բանակ, առաջարկվում է բանակ զորակոչվել որպես սպա, դրա դիմաց ստանալ աշխատավարձ, ուսման ծախսերի փոխհատուցում բակալավրիատում, իսկ հետո` նաեւ մագիստրատուրայում։ Անդրադառնալով այսօր ԵՊՀ կենտրոնական մասնաշենքի առջեւ հայտարարված դասադուլին եւ ուսանողների պահանջներին՝ ՀՀ պաշտպանության նախարարը նկատել է, որ յուրաքանչյուր քաղաքացի ունի սեփական կարծիքն ունենալու եւ այն արտահայտելու իրավունք, եւ որ ընդդիմախոս երիտասարդները նույնպես հրավիրվել են, սակայն դասադուլ հայտարարած նախաձեռնող խմբի որեւէ անդամ հանդիպմանը չի ներկայացել։ Վիգեն Սարգսյանը պատասխանել է նաեւ հանդիպման մասնակիցների հարցերին՝ նշելով, որ պաշտպանության նախարարությունը մշտապես բաց է հասարակական քննարկումների, խնդրահարույց հարցերի բարձրաձայնման եւ կարծիքների փոխանակման համար։
Հետևեք մեզ Viber-ում
