Օֆշորային սկանդալի հետքերով.Թուրքիայի վարչապետի մեկնաբանությունը

Ինչպես գրում է թուրքական «Բիրգյուն» պարբերականը,  Թուրքիայի վարչապետ Բինալի Յըլդըրըմը մեկնաբանել է իր երկու որդիների շուրջ ծագած օֆշորային սկանդալը և քննադատել է լրատվամիջոցներին, որոնք փորձում են այլ լույսի ներքո ներկայացնել հարցը: «Ես նավային ինժեներ եմ, ամբողջ կյանքում այդ գործով եմ զբաղվել, քաղաքականություն մտնելուց առաջ էլ գործս հանձնել եմ տղաներիս: Նրանք իրենց գործն են անում, ես՝ իմ: Սակայն նրանց մի խորհուրդ եմ տվել՝ պետության հետ երբեք գործ չանեք, պետական բանկերից ոչ մի աղբյուր չօգտագործեք: Նավաշինությունը գլոբալ գործ է, աշխարհի ամեն ծայրում էլ կա, սրա մեջ գաղտնի պահելու բան չկա:Համացանցն այսօր թույլ է տալիս ցանկացած մարդու ձեռք բերել ամեն տեսակի տեղեկություն յուրաքանչյուր գործարարի ունեցվածքի մասին »,- ասել է Թուրքիայի վարչապետը: Նա նաև պնդել է, որ իր որդիների՝ Թուրքիայում գտնվող ընկերությունները երկրի ամենախոշոր հարկատուներն են: «Իմ ժողովուրդն ինձ գիտի, ես անձեռնմխելիություն ունեմ, բայց տղաներս չունեն, այստեղից հրավիրում եմ՝ ով ցանկանում է՝ ամեն տեսակի հետաքննություն կարող է սկսել ու կատարել: Փողն այսօր կա, վաղը չկա, բայց մարդու համբավն իր հետ այն աշխարհ էլ է գնում: Երբ դուք մեզ մեղադրում եք հարկ չվճարելու համար, իմ որդիների ստամբուլյան ընկերություններն այս պետության ամենախոշոր հարկատուների ցանկում են տեղ գտնում», - ասել է Յըլդըրըմը: Հիշեցնենք, որ ըստ Լրագրողական հետաքննությունների միջազգային կոնսորցիումի (ICIJ) հրապարակած Paradise Papers զեկույցի՝ Թուրքիայի վարչապետի որդիներ Էքրամ և Բյուլենթ Յըլդըրըմները բավականին մեծ գումարներ են ներդրել Մալթայում գտնվող նավաշինական օֆշորային ընկերություններում: