Ինչու է ՔՊ–ն ուզում Վարդան Ղուկասյանին մտցնել Գյումրիի ավագանու ընտրարշավ

Գյումրիում «Բալասանյան» դաշինքը լուծարելուց հետո Նիկոլ Փաշինյանը փորձում է իրենով անել քաղաքը։ Համապետական ընտրություններին և Ալիևի պահանջով իրականացվելիք սահմանադրական հանրաքվեին ընդառաջ Հայաստանի երկրորդ քաղաքը սեփականաշնորհելը նրա համար կարևոր նշանակություն ունի։
«Քաղաքացիական պայմանագրի» թեկնածուն ԱԺ պատգամավոր Կարեն Սարուխանյանն է։ ՔՊ–ն հույս ունի, որ վարչական, կրիմինալ և փողային լծակների օգնությամբ կկարողանա զավթել իշխանությունը Գյումրիում։ Գործի են դրվել հին ու «բարի» մեթոդները։
ՔՊ–ն այս ամենով հանդերձ նաև վախեր ունի, որ գյումրեցիները կարող են մերժել ՔՊ–ին ու Կարեն Սարուխանյանին, որի հանդեպ բացասական վերաբերմունքը ահռելի է։ Նիկոլենք լավ հասկանում են, որ եթե ընդդիմադիր դաշտը ճիշտ կոնֆիգուրացիայով մասնակցի, ապա Գյումրիում իրենք կպարտվեն։ Դրա համար էլ չեն կողմնորոշվում արտահերթ ընտրության անցկացման ժամկետների հարցում։
Ընտրություններն իրենց համար ցանկալի արդյունքով ավարտելու համար ՔՊ–ն բազմաթիվ դրածոների է մտցնում խաղի մեջ։ Խոսվում է հակաեկեղեցական պայքարով աչքի ընկած սորոսական Կարեն Պետրոսյանի, «Լուսավոր Հայաստանի», Արամ Զավենի Սարգսյանի, 2021–ին ընդդիմադիր ներկայացած ու հետո նիկոլենց կողմն անցած ավագանու գործող անդամ Վարդևան Հակոբյանի, տեղական նշանակության դրածոների մասնակցության մասին, որոնց ֆունկցիան լինելու է կեղծ ընդդիմադիր բառապաշարով ընտրություններին մասնակցելն ու հետո այդ քվեները ՔՊ–ի օգտին ծառայեցնելը։
Ընտրություններն իրենց համար ցանկալի սցենարով տանելու համար ՔՊ–ն, մեր ունեցած տեղեկություններով, նաև ուզում է դրդել Գյումրիի նախկին քաղաքապետ Վարդան Ղուկասյանին, որպեսզի նա մասնակցի ավագանու արտահերթ ընտրություններին։ ՔՊ–ն այդպիսով ուզում է Ղուկասյանին արհեստականորեն դարձնել իրենց հիմնական հակառակորդ, որպեսզի նրա ֆոնին իրենք մաքուր ուժ երևան։ Նիկոլ Փաշինյանի հաշվարկն այն է, որ բազմաթիվ քրեական գործերով անցնող Վարդան Ղուկասյանն իրենց համար կառավարելի ընդդիմախոս կարող է լինել, ում կարելի է քրեական գործերի մահակով դարձնել Սամվել Բալասանյանի պես վերահսկելի։ Բացի այդ՝ Վարդան Ղուկասյանի եղբոր որդին բանտում է, ինչը նույնպես առևտրի առարկա կարող է դառնալ։ ՔՊ–ում Վարդան Ղուկասյանին ուզում են դրդել առաջադրման, որպեսզի նաև քարոզչական դաշտում կարողանան առաջ մղել նախկին–ներկա կեղծ օրակարգը։
Ղուկասյանն, ըստ լուրերի, շատ լավ հասկանում է ՔՊ–ի մտադրությունների մասին։ Նա դեռ դիմադրում է և չի ուզում մասնակցել ընտրություններին՝ տեսնելով, որ իրեն ուզում են օգտագործել։
Այսպիսով, ՔՊ–ի ներսում ծրագրում են Վարդան Ղուկասյանին խաղի մեջ մտցնել, որպեսզի ընտրություններից հետո նրա հավաքած քվեներն օգտագործեն այնպես, ինչպես օգտագործեցին Սամվել Բալասանյանի քվեները 2021–ի ընտրությունների ժամանակ։ ՔՊ–ն ուզում է Վարդան Ղուկասյանի միջոցով փոշիացնել ընդդիմադիր ձայների մի մասը։
Կգնա՞ Վարդան Ղուկասյանը գործարքի, չի՞ դիմանա ճնշումներին ու կառաջադրվի՞, պարզ կդառնա մոտ օրերս։ Հայտնի է, որ նա չի ընդունում Նիկոլ Փաշինյանի իշխանությանը, սակայն մյուս կողմից էլ քրեական գործերի առկայությունը նրան խոցելի ու կառավարելի է դարձնում։
Մեկ բան պարզ է, որ եթե Ղուկասյանին թվա, որ կարող է պայմանավորվել տխրահռչակ Կարեն Սարուխանյանի հետ ու իր հարցերը լուծել, ապա պետք է նայի, թե ինչ տեղի ունեցավ Սամվել Բալասանյանի հետ և ինչ է տեղի ունեցել բոլոր նրանց հետ, ովքեր պայմանավորվել են նիկոլենց հետ։ Պայմանավորվողները պարզապես քցվել են ու հայտնվել բանտում (կամ էլ՝ ճողոպրել ու դասալիք դարձել այնպես, ինչպես Սամվել Բալասանյանը)՝ զուգահեռաբար արժանանալով նաև ընդդիմադիր ընտրազանգվածի քննադատությանը։
Թե ինչպիսի զարգացումներ կլինեն Գյումրիում, կերևա շատ շուտով։ Ամեն դեպքում վերջնական խոսքը գյումրեցուն է պատկանում։ Սրանց քայլարշավը Գյումրիից սկսվեց։ Գյումրիից էլ պետք է սկսել սրանց հեռացման գործընթացը։