Գյումրիում քաղաքապետ ընտրելու օրակարգով ՔՊ-ի հրավիրած արտահերթ նիստին քվորում կլինի՞. խմբակցությունները հրաժարվում են մասնակցել

«Քաղաքացիական պայմանագիր» խմբակցությունը Գյումրիի քաղաքապետ ընտրելու օրակարգով նոյեմբերի 8-ին արտահերթ նիստ է հրավիրել։

Արտահերթ նիստը կկայանա, եթե ավագանու 20 անդամներից 17-ը ներկա լինեն։

Ավագանու 2 մանդատ ունեցող ՀՀԿ-խմբակցության ղեկավար Նարեկ Միրզոյանը «Փաստինֆոյի» հետ զրույցում ասաց ՔՊ-ի օրակարգով հրավիրած նիստին չեն մասնակցելու։

«Մենք ի սկզբանե հայտարարել ենք՝ ՀՀԿ-ն ՔՊ-ի որևէ նախաձեռնության մասնակցություն ունենալու ցանկություն չունի, ի սկզբանե հայտարարել ենք, որ ՀՀԿ-ն չի մասնակցելու այդ նիստին»։

Եվս 2 մանդատ ունեցող «Ապրելու երկիր» խմբակցության ղեկավար Կարեն Մալխասյան էլ ասաց, որ իրականում այստեղ օրենսդարական բաց կա, քանի որ ավագանու նիստը հրավիրողը՝ համայնքի ղեկավարը չկա։ «Ես իրենց ՔՊ-ին այսօր պատասխանել եմ, որ մինչև ավագանու ղեկավար ընտրելու համար նիստ հրավիրելը՝ նախ ավագանին պետք է որոշեր թե այդ նիստը որ օրն է կայանալու։ Որից հետո միայն նիստ պետք է հրավիրվեր, այս պարագայում մենք չենք մասնակցելու նիստին»,-ասաց Մալխասյանը։

ՔՊ-ն 33-ից 11 տեղ ունի ավագանու կազմում, ևս 3 մանդատ ունի «Զարթոնք» խմբակցությունը, ավագանու կազմում նաև 1 անկախ ավագանու անդամ կա։ Եթե անգամ վերջիններս որոշեն մասնակցել նիստին՝ նոր համայնքապետ ընտրելու օրակարգով նիստը քվորում չլինելու պատճառով չի կայանա։