Հերթը հասավ առողջապահությանը

Առողջապահության ոլորտին 2018թ. պետական բյուջեով նախատեսվում է հատկացնել 80.1 միլիարդ դրամ,որը 5.1 միլիարդ դրամով պակաս է, քան 2017-ի բյուջեով հաստատված մեծությունն էր: Ազգային ժողովում ՀՀ 2018թ. պետական բյուջեի նախագծի քննարկման ժամանակ այս մասին հայտնեց ՀՀ ֆինանսների նախարարի առաջին տեղակալ Ատոմ Ջանջուղազյանը:«Դա բացարձակ թվով շուրջ 5.8 միլիարդ դրամով պակաս է 2017թ. հատկացումից: Սակայն ցանկանում եմ նշել, որ սա չի նշանակում, որ շահառուներին մատուցվող ծառայությունները կվատթարացվեն: Հակառակը՝ կա համոզմունք, որ հնարավոր է ավելի փոքր բյուջեով շատ ավելի լավ արդյունքների հասնել»,-   ասաց Ջանջուղազյանը:Հիվանդանոցային ծառայությունների համար կհատկացվի 30.1 միլիարդ դրամ, արտահիվանդանոցային ծառայությունների համար նախատեսված բյուջեն կազմում է 24.5 միլիարդ դրամ: 2018 թվականի պետական բյուջեի նախագծով՝ ՀՀ աշխատանքի և սոցիալական հարցերի նախարարությանը հատկացվելու է 408.7 միլիարդ դրամ, որը գրեթե նույնն է, ինչ 2017 թվականի բյուջեի հատկացումներն էին,ասաց Ատոմ Ջանջուղազյանը և հավելեց, որ այդ գումարից 236 միլիարդն օգտագործվելու է կենսաթոշակների համար: Նրա խոսքով՝ 2017 թվականին կենսաթոշակների համար նախատեսվող գումարը եղել է 248 միլիարդ, բայց հավաստիացրեց, որ կենսաթոշակները որքան եղել են, այնքան էլ պահպանվելու են: 2018 թվականի բյուջեի նախագծով նպաստների համար նախատեսվում է 78.6 միլիարդ դրամ, ինչը, Ա. Ջանջուղազյանի խոսքով, գրեթե նույն է, ինչ 2017-ին էր: