«Անթույլատրելի արաք եք թույլ տվել. Ներողություն խնդրեք». Մինասյանի դիտարկմանն Ալեն Սիմոնյանը արձագանքեց՝ «Ելույթով կպատասխանեմ. չլքեք դահլիճը»
«Հայաստան» խմբակցության պատգամավոր Արծվիկ Մինասյանն այսօր ԱԺ նիստի ժամանակ պահանջեց՝ ԱԺ նախագահ Ալեն Սիմոնյանը ներողություն խնդրել նախօրեին իր պահվածքի համար։
«Երեկ թույլ տվեցիք անթույլատրելի արաք, որպես Աժ նախագահ որերորդ դեպքն է՝ ռեպլիկներ, արտահայություններ եք անում, որոնք հարիր չեն թե՛ Աժ-ին, թե՛ Աժ նախագահին, հետևաբար, առաջարկում եմ ձեզ ներողություն խնդրել այդ պահվածքի համար, որպեսզի հասարակությունը հասկանա, որ Աժ-ն իրենց ներկայացուցչության բարձրագույն մարմինն է, այլ ոչ թե փողոցային բարքերով շարժվող կառույց։ Նաև ստանձնել պարտավորություն, որ հետայսու նման երևույթները կկասեցվեն ի սկզբանե»,-ասաց Մինասյանը։
Աժ ամբիոնի մոտ այդ պահին մեկ այլ հարցով զեկուցող Արդարադատության փոխնախարար Արմենուհի Հարությունյանն էր։ Ալեն Սիմոնյանը դիմեց նրան՝ հարցնելով, թե արդյոք Հարությունյանը ցանկանում է արձագանքել։
Փոխնախարարը պատասխանեց, որ ոչ։ «Արձագանք ունե՞ք, պարո՛ն Մինասյան»,-դիմեց Սիմոնյանը ընդդիմադիր պատգամավորին։
«Իմ հորդորը բխում է նաև սահմանադրական այն կարգավիճակից, որն ունի ԱԺ նախագահը և կարծում եմ, որ կարևոր է, որպեսզի մշակույթի փոփոխությունը տեղի ուենա այս դահլիճից, հակառակ դեպքում ուղղակի փողոցային բարքերին համապատասխան շատ ավելի վատ սցենարներ կարող են լինել, որոնք անթույլատրելի և անընկալելի կարող են լինել թե՛ հասարակության, թե՛ ներկայացուցչական այս մարմնի կողմից»,-ասաց նա։
Սիմոնյանը կրկին դիմեց փոխնախարարին. «Տիկի՛ն Հարությունյան, էլի բան չունե՞ք ասելու»,-բացասական պատասխան ստանալուց հետո՝ նա դիմեց Մինասյանին՝ նշելով, թե կարծում էր, որ Մինասյանը ելույթ կունենա, ինքն էլ ելույթով կպատասխանի։ «Ելույթ չունեցաք, բայց ես ելույթով Ձեզ կպատասխանեմ, կխնդրեմ չլքեք դահլիճը»,-ասաց նա։