Իրանը եւ Թուրքիան կարող են առաջատար դեր խաղալ Հարավային Կովկասում անվտանգության ապահովման համար. Արաղչի
Իրանի արտաքին գործերի նախարար Աբաս Արաղչին հայտնել է, որ Իրանը եւ Թուրքիան կարող են վճռական դեր խաղալ տարածաշրջանում խաղաղության, ինչպես նաեւ միջազգային անվտանգության ապահովման համար, տեղեկացրել է Mehr-ը։
Շաբաթ օրը Ստամբուլում թուրք գործընկերոջ՝ Հաքան Ֆիդանի հետ համատեղ ասուլիսում ելույթ ունենալով, Իրանի բարձրաստիճան դիվանագետը հայտնել է, որ «3+3» գագաթաժողովի շրջանակում կարեւոր բանակցություններ են վարվել Հարավային Կովկասի վերաբերյալ։ «Թուրքիայի արտաքին գործերի նախարար Հաքան Ֆիդանի եւ իմ միջեւ տեղի են ունեցել կառուցողական երկկողմ բանակցություններ։ Իրանի Իսլամական Հանրապետությունը եւ Թուրքիայի Հանրապետությունը երկու կարեւոր երկրներ են տարածաշրջանում եւ իսլամական աշխարհում, որոնք բազմադարյա բարեկամական եւ եղբայրական հարաբերություններ ունեն»,- նշել է Արաղչին։
Իրանը եւ Թուրքիան, ամրապնդելով համագործակցությունը, կարող են կարեւոր դեր խաղալ տարածաշրջանում խաղաղության եւ զարգացման ապահովան համար, ինչպես նաեւ կարող են անվտանգություն ապահովել միջազգային ասպարեզում, ընդգծել է Իրանի արտգործնախարարը։
Մեկնաբանելով երեկվա «3+3» գագաթաժողովը՝ Արաղչին ավելացրել է. «Առաջին հանդիպումից հետո, որը տեղի է ունեցել Թեհրանում անցած տարի, երրորդ հանդիպումը հաջողությամբ կայացավ Ստամբուլում՝ Ռուսաստանի, Ադրբեջանի Հանրապետության եւ Հայաստանի արտաքին գործերի նախարարների մասնակցությամբ»։
Ընդգծելով խաղաղության եւ կայունության ապահովման կարեւորությունը տարածաշրջանում եւ Կովկասում՝ մասնակից երկրները հայտնել են, որ համաձայն չեն արտատարածաշրջանային տերությունների եւ խաղացողների առկայությանը, որոնք տարածաշրջանում անկայունություն են ստեղծում։
NEWS.am