ՌԴ ԱԳՆ-ի ներկայացուցչի լավատեսությունը ես չեմ կիսում. հնարավոր չէ կազմակերպել արցախցիների վերադարձը

Ռուսաստանի ԱԳՆ պաշտոնական ներկայացուցիչը հայտարարել է, թե Ռուսաստանը Ադրբեջանի հետ շփումներում բարձրացնում է Ղարաբաղից փախստականների հարցը, նրանք այսօր էլ տուն վերադառնալու հնարավորություն ունեն:
«Ես հիմա չեմ ուզում մեկնաբանել պաշտոնական Երևանի գործողությունները, թե ինչ է արվել նրանց կողմից, այս հարցը պետք է տալ նրանց։ Ես ներկայացնում եմ մի երկրի արտաքին գործերի նախարարությունը, որը գիտի, թե ինչ է նշանակում մարդկանց զրկել տնից, և այս առումով շատ բան է արել, այդ թվում՝ այնպիսի բաներ, որոնք դուր չեն գալիս միջազգային հանրության որոշ ներկայացուցիչների»,- ասել է Մարիա Զախարովան։ Ռուսական ԱԳՆ-ի ներկայացուցչի լավատեսությունը ես չեմ կիսում, այսօր, առկա պայմաններում հնարավոր չէ կազմակերպել արցախցիների վերադարձը։ Մեկ տարուց ավելի, Արցախը, որ հազարամյակներ հային է պատկանել, գտնվում է թշնամու տիրապետության տակ, իսկ մեր երկրի իշխանությունները բացարձակապես ոչինչ չեն արել պաշտպանելու համար Արցախը, պարզապես հանձնել են։ Բազմիցս նշել եմ, որ Արցախի հանձնումը դավաճանություն էր մեր երկրի ղեկավարության կողմից։ Պատկերացրեք արցախցիների վիճակը, որ չորս կողմից շրջապատված էին, ու Հայաստանի ղեկավարն ասում է՝ դա ձեր հողը չէ։ Իշխանության գալուց հետո Նիկոլ Փաշինյանը բազմիցս ասել է, որ Արցախի հարցը լուծելու են հանրային քվեարկությամբ, սակայն ոչինչ չի արել, խաբել է ժողովրդին և արցախցիներին և բոլորիս։
Մեկ այլ կարևոր դրվագ, անհրաժեշտ է պահպանել Արցախի պետական ինստիտուտները։ Օրինակը, նույն Ադրբեջանն է, որն արցախյան առաջին պատերազմից հետո ստեղծել էր վտարանդի կառավարություն, որն իբր պետք է ղեկավարեր Լեռնային Ղարաբաղը հետագայում և միջազգային ասպարեզում առաջ էր մղում իր շահերը։ Իսկ այժմ Արցախը հանձնելուց հետո, արցախցիների Հայաստան տեղափոխվելուց հետո, Հայաստանի գործող իշխանությունները գնում են հակառակ ուղղությամբ, ջանքեր են գործադրում այդ պետական ինստիտուտները ցրելու ուղղությամբ, որպեսզի վերացնեն արցախյան հետքը։
Հայաստանյան դատարանները կարող են արդարացնել գործող իշխանություններին, փաստերը կարող են կեղծել, կարող են ամեն կերպ հերքել իրենց առաջադրվող մեղադրանքները, սակայն հայոց պատմության մեջ Նիկոլ Փաշինյանի գլխավորած իշխանությունները մնալու են որպես դավաճան և դա այլևս անհերքելի փաստ է։

Համահայկական ճակատ շարժման և կուսակցության առաջնորդ Արշակ Կարապետյանն