Բաքվից արձագանքել են Փաշինյանին ու մեղադրել
Բաքվից արձագանքել են այսօր ՔՊ-ի նախաձեռնած «Խաղաղության խաչմերուկ. միավորելով անվտանգությունն ու ժողովրդավարությունը» խորագրով համաժողովի ժամանակ Նիկոլ Փաշինյանի հնչեցրած հայտարարություններին ու մեղադրել իրականությունը խեղաթյուրելու փորձի մեջ։
Ադրբեջանական լրատվամիջոցների փոխանցմամբ՝ այդ երկրի արտաքին գործերի նախարարության մամուլի քարտուղար Այխան Հաջիզադեն ասել է, թե «Հայաստանի վարչապետի հայտարարությունը եռակողմ հայտարարության՝ հաղորդակցությունների բացման հարցի վերաբերյալ ևս մեկ անգամ ցույց է տալիս ստանձնած պարտավորության՝ Հայաստանի ղեկավարության կողմից անտեսումը։ Եռակողմ հայտարարության 9-րդ կետում հստակ նշված է, թե որոնք են Հայաստանի պարտավորությունները՝ հաղորդակցությունները բացելու ուղղությամբ եւ ինչ ձեւով պետք է կազմակերպվի տրանսպորտային հաղորդակցության նկատմամբ հսկողությունը»։
Ավելին, եռակողմ հայտարարությունը խախտած ու Արցախում էթնիկ զտում իրականացրած Ադրբեջանի արտգործնախարարի մամուլի քարտուղարը պնդել է, թե Հայաստանն է խախտել նաեւ այլ կետեր. «Ընդհանուր առմամբ, եթե խոսենք նոյեմբերի 10-ի եռակողմ հայտարարությունից բխող այլ պարտավորությունները խախտող Հայաստանի գործողությունների մասին, ապա նախ պետք է հիշել, որ Հայաստանն իր անօրինական զինված կազմավորումները դուրս չի բերել Ղարաբաղից մինչև 2023թ.... »։
Աղբյուր` Փաստինֆո