Ասում եք՝ ճանապարհ եք սարքել, ձեր այդ ճանապարհներով տանկեր են անցնում. Կարո Փայլան
« Իշխանություններն իրենց կառուցած կամուրջներով, ճանապարհներով ու այլ շինարարական նախագծերով հպարտանալու փոխարեն պետք է պատասխան տան Ստամբուլի էկոհամակարգն ամբողջովին խախտելու համար:Ասում եք՝ ճանապարհ ենք սարքել: Այդ ամենի հետևում շատ բան կա, որի մասին չեք խոսում: Այդ ճանապարհների հետևում կային անտառներ, ծառեր, որոնք դուք հատեցիք, կային այգիներ, այգեգործներ, գյուղացիներ, որոնք իրենց կյանքն էին վարում այստեղ, այստեղ էկոհամակարգ կար, դուք փչացրել եք տեղի էկոհամակարգը: Քաղաքները մնացին փոշու, կեղտի ու աղմուկի մեջ»,- demokrathaber.org կայքի փոխանցմամբ, ասել է Թուրքիայի ընդդիմադիր Ժողովրդադեմոկրատական կուսակցության անդամ, խորհրդարանի հայազգի պատգամավոր Կարո Փայլանը, դիմելով երկրի տրանսպորտի և կապի նախարար Ահմեդ Արսլանին: Հայազգի պատգամավորը նշել է, որ իշխող կուսակցության վարած քաղաքականության հետևանքով երկիրը չի կարողանում հասնել խաղաղության, իսկ քաղաքացիները զուրկ են մնացել հանգիստ կյանք վարելու իրավունքից: «Ձեր այդ շինած ճանապարհներով տանկեր են անցնում, ռազմական մեքենաներ: Թող այդ ճանապարհներով մեր ժողովուրդը հանգիստ կարողանա անցնել», - ասել է Փայլանը: Նա հիշեցրել է տրանսպորտի և կապի նախարարին, որ երկրում աշխատավորների մահվան ամենաշատ դեպքերը գրանցվում են հենց այդ ոլորտում, ինչի մասին իշխանությունները նույնպես լռում են:
Հետևեք մեզ Viber-ում
