Այս գործն այս վիճակում ուղղակի գցել են Առաջին ատյանի դատարանի «գրպանը». Ռոբերտ Քոչարյան

«Մի օպերացիա էր մշակվել, որը տևեց երեք տարի։ Դրան գումարենք այն փաստը, որ ՍԴ-ում այդ որոշմանը քվեարկել են մարդիկ, որոնք իրավունք չեն ունեցել քվեարկելու»,- ասաց Քոչարյանը՝ նշելով, որ քվարկողների մեջ եղել են Վահե Գրիգորյանը և Սասուն Խաչատրյանի եղբայրը։

Նրա խոսքով՝ եթե դատավորը ունենա բավարար համարձակություն, ուղղակի կկարճի գործը։

«Այսօր չկա մեղադրանք, չկա հոդված։ Իմ տպավորությամբ՝ այս գործն այս վիճակում ուղղակի գցել են Առաջին ատյանի դատարանի «գրպանը», այս վիճակից օրինական լուծում ուղղակի չկա»։

Հարցին՝ այժմ կա՞ «զանգովի արդարադատություն», Ռոբերտ Քոչարյանն արձագանքեց՝ իսկ ընդհանրապես արդարադատություն կա՞.

«Ես ավելի քան 1.5 տարի կալանավորված եմ եղել ապօրինաբար, չեղած հոդվածով, և մինչև հիմա ինձնից ոչ դատախազությունը կամ որևէ այլ մարմին ներողություն չի խնդրել։ Ավելին, շարունակում են աճպարարությամբ այս գործը հետ բերել դատարան՝ ինչ–ինչ նպատակներով։ Այն, ինչ կատարվում է իրավական խուլիգանություն է։ Ոչ միայն այս գործի հետ կապված, տեսնում եք կալանավորների ու քաղաքական հետապնդումների քանակը»։