Պուտինի դեմ Փաշինյանի դեմարշն ի՞նչ կարժենա Հայաստանին

Ինչպես և սպասվում էր, Նիկոլ Փաշինյանը հավատարիմ մնաց իր արևմտյան տերերին և Մոսկվայում հերթական դեմարշը կատարեց անձամբ Պուտինի դեմ:

Հոկտեմբերի 7-ին Մոսկվայում կայացավ Անկախ Պետությունների Համագործակցության (ԱՊՀ) երկրների արտգործնախարարների խորհրդի հերթական նիստը։

Հանդիպումը դարձավ մասնակից երկրների արտաքին քաղաքական դիրքորոշումների համակարգման կարևոր փուլ, որի արդյունքում ստորագրվեցին մի քանի առանցքային փաստաթղթեր՝ ուղղված հետագա համագործակցությանը։

Սակայն ԱՊՀ նիստում Հայաստանը որոշեց հրաժարվել երկու կարևոր հայտարարությունների ստորագրումից:

Առաջին հայտարարությունը վերաբերում էր «Եվրասիական անվտանգության ապահովման սկզբունքներին», իսկ երկրորդը՝ «Միջազգային հարաբերություններում միակողմանի սահմանափակող միջոցների կիրառման անթույլատրելիության մասին» էր։

Ավելին, Փաշինյանին մոտ կանգնած պաշտոնական լրատվական կառույցներից մեկի բնորոշմամբ՝ այս փաստաթղթերի ստորագրումից Երևանի հրաժարվելը կապված է ԱՊՀ դաշնակիցների, մասնավորապես՝ Ռուսաստանի հետ Հայաստանի հարաբերությունների վատթարացման հետ։

Այսինքն՝ Փաշինյանը չի էլ թաքցնում, որ այս քայլը պայմանավորված է հայ-ռուսական հարաբերությունների վատթարացմամբ:

Մոսկվայում Փաշինյանի այս դեմարշը գնահատեցին որպես Հայաստանի արտաքին քաղաքական կուրսը փոխելու ևս մեկ քայլ:

Արդեն մի քանի ամիս է, ինչ Փաշինյանը ցուցադրում է տարածաշրջանի միջազգային կազմակերպությունների հանդեպ ստանձնած պարտավորությունները վերանայելու իր ցանկությունը։

Պաշտոնական Մոսկվայի կարծիքով, Փաինյանի այս դեմարշները ցույց են տալիս մեկ բան, որ թեև Հայաստանը մնում է երկու կազմակերպությունների (ՀԱՊԿ, ԵԱՏՄ) ֆորմալ անդամ, նրա գործողությունները վկայում են իր պարտավորությունները վերանայելու և արտաքին քաղաքականության նոր ուղենիշներ փնտրելու աճող ցանկության մասին:

Ըստ մոսկովյան դիտորդների, չի բացառվում, որ Մոսկվան ևս իր քայլը կատարի և ցույց տա Հայաստանին նաև ԵԱՏՄ-ից դուրս գալու ուղին: Որին անմիջապես կհետևի նաև տնտեսական հարաբերությունների խզումը:

Հերիք է ընդամենը գազի գինը 165 դոլարից դարձնել 350 դոլար, որից հետո Հայաստանի տնտեսական կոլապսը կդառնա օրերի հարց:

Սակայն, այս խզման տնտեսական հետևանքներից բացի, կլինեն նաև ավելի վտանգավոր հետևանքներ՝ Ադրբեջանի նոր ռազմական հարձակման տեսքով: Եվ միայն դրանից հետո հայ հանրությունը կհասկանա, որ ոչ ամերիկյան, ոչ էլ ֆրանսիական նավերը չեն կարող բարձրանալ հայկական բարձրավանդակի վրա և Հայաստանի բնակչության ճակատագիրը կնմանվի արցախցիների ճակատագրին:

Բայց դրա մեղավորը կլինի ոչ միայն Փաշինյանը, այլև բոլոր այն քաղաքական շրջանակները, որոնք սպասում են դիտորդի կարգավիճակով, թե ինչ կլինի Հայաստանի հետ, որպեսզի հետո դիրքավորվեն իրենց շահերի տիրույթում: Եվ ոչինչ, որ Հայաստանից կարող է ոչինչ չմնալ:

Ո՞ւմ են պետք, օրինակ արցախյան գործիչները Արցախի կորստից հետո․ գրեթե ոչ մեկին: Քանզի նաև իրենց կրավորական պահվածքի պատճառով կորսվեց Արցախը:

Այսօր արդեն նույն գործընթացը ծավալվում է Հայաստանի շուրջ, և նույն այն դերակատարը, ով իր քաղաքականությամբ կործանեց Արցախը, այսօր կործանում է Հայաստանը՝ քաղաքական դաշտի քար լռության պայմաններում:

Սա՛ է իրականությունը:

Դավիթ Մկրտչյան
Աղբյուրը՝ Zham.am